Mynjur ka Sorkar ia ka SOP ha ka thungkam bad kyntiew kyrdan ha ki tnat Sorkar katkum ka por

Syllad | The Rising MeghalayaJuly 11, 2024

Ka Kynhun Myntri ka Sorkar Jylla ha ka 10 tarik Naitung ka la mynjur ban pyntreikam ia ka ka Standrad Operating Procedures (SOPs) ban pynthikna ba ka jingthungkam bad ka jingkyntiew kyrdan ha ki tnad sorkar bapher bapher kan long katkum ka por ba la buh beit ryntih.

Haba kren sha ki lad pathai khubor hadien ka jingialang, u Myntri Rangbah ka Jylla u Conrad K Sangma u la ong, “Ia kane ka SOP yn pyntreikam noh da ki Head jong ki Department (HoDs) bapher bapher kumjuh da ki tnad ba dei khmih ha ka liang ka thungkam thungjam.”

“Ngi la trei shitom ban pynbeit ryntih ia baroh ki tnad personnel bad ia ka rukom pynrung kam bad ka jingkyntiew kyrdan. Kumta mynta ka sngi ha ka jingialang ka kynhun Myntri ngi la mynjur ia ka SOPs na ka bynta ban pynlong ia ki eksam, ban pynbna ia ki result, advertisement bad ki jingtip kiba iadei bad ki kam kiba lait khnang ban lah ban pynsted ha kaba iadei bad ka jingpynrung kam,” ong u Sangma.

Kumta ruh u la ong ba yn sa bthah mynta ia ki tnad bapher bapher ba kin pynthikna na ka bynta ban aijingtip ia ki kam kiba lait hapoh ka por ba la buh, kata da kaba bynrap ruh ba wat ka MPSC, DSC lane ki Department Selection Committee kiba la don kin ioh da ka por ban pyndap ia baroh ki kam kiba lait bad ka jingpynlong ia ki eksam ruh kan kham suk bad iaid beit iaid ryntih. U la ong ruh ba ka jingpynbna ia ki result ruh kan long ha ka rukom kaba beit.

Nalor kata u Myntri Rangbah u la ong ruh ba ka Sorkar ka la buh beit da ka por ia ki department promotion committee ha kaba ia ki jingkyntiew kyrdan ia ki nongtrei dei ban pyndep mardor mar ia don kiba shongthait khnang ba kan ym shim por shuh da kumba 3-5 bnai ban kyntiew kyrdan kumba la jia ha ki por kiba la dep.