Mynjur ka Sorkar ia ka Tender Committee ban aiti ia ka 108 Emergency sha ki kompeni

Syllad | The Rising MeghalayaMay 18, 2024

Ka Sorkar Jylla ka la ai ka jingmynjur ia ka Tender Committee kaba thymmai na ka bynta ban pyniaid ia ka 108 Emergency Services sha ka kompeni bathymmai.

Haba pyntip ia kane ha ka 17 tarik Jymmang, ka Myntri ka Tnat ka Koit ka khiah ka Kong Ampareen Lyngdoh ka la ong, ” Mynta ka sngi Nga la ai ka jingmynjur ia ka Tender Committee kaba thymmai bad ha kan ka kynti kaba mynta ngi dei ban pyniaid bha ia ki rukom treikam.

Ka la ong ba ka long kaba sngew bynniaw ba ka jingai jingshakri jong ka 108 emergency services kam shym la long kaba iaid beit iaid ryntih ha une u snem ba la dep.

Haba kylli, ka Myntri ka la ong, “Ia mynta hi ka NHM ka la shimti ban pyniaid ia kane ka kam. Ki nongtrei ki la pynpaw ia ka jingsngewhun hynrei ka long kaba sngew bynniaw namar ka NHM kam dei satia ka kynhun kaba dei biang na ka bynta ban pyniaid ia ka jingshakri ia ka 108.

Haba pynpaw ka jingsngewkhia halor ki hok jong ki nongtrei, ka Myntri ka la ong, ki la don artylli ki jingjia ha kaba ki nongtrei jong ngi ki la iakynduh ia ki jingjia tyngkhuh kali kaba jur ha kaba uwei na ki la pynbna ba u la kylla anna.

“Um shym la ioh satia kino kino ki jingmyntoi, ki jingmyntoi na ka kam ba u la shakri, ka jingbuh kynshew bad insurance, kane kan ym lah ban iaid kumne. Nga la sngew bynniaw shibun na ka bynta ki nongtrei. Ha ka jingshisha ngim shym la phaikhmat halor kaei kaba donkam ba ngin leh na ka bynta kine ki arngut ki nongtrei kiba mynta kim lah shuh ban leitphai sha la ka jong ka kam. Jin da la don ka kompeni kaba treikam ka ban pyniaid ia ka jingshakri ka EMRI, kine ki nongtrei kin jin da la ioh jingmyntoi,” ong ka Kong Ampareen da kaba pynthikna ruh ba ka dang pynlong ka jingiakren hapoh ka sorkar ban khmih ba da kino ki lynti yn lah ban khmih ia kiba kum kine ki briew.

“Ia ki hok jong ki nongtrei la pynkhein namar ym shym la pyntreikam, bad kam shym la don ka kynhun ba la pynkupbor ka ban pyniaid ia ka 108 Servces,” ka la bynrap.