Mynjur ka Sorkar Jylla ia ka Ordinance ban teh kyndon ia ka jingtreikam ka Medical College shimet

Syllad | The Rising MeghalayaOctober 23, 2024

Ka Sorkar Jylla ha ka 23 tarik u Risaw ka la mynjur ia ka Meghalaya Private Medical Institution (Regulation of Admission, Fixation of Fees and Reservation) Ordinance, 2024 bad Meghalaya Medical College Regulation and Admission into MBBS course, 2024.

“Ka Sorkar ka la mynjur ia ka Ordinance bad kan sa iakynduh biang ban thaw ia ka Regulatory Body,” ong ka Myntri ka Tnad ka koit ka khiah ka Kong Ampareen Lyngdoh haba kren sha ki lad pathai khubor hadien ka jingialang ba la pyniaid da u Myntri Rangbah ka Jylla u Conrad K Sangma ha Resubelpara, North Garo Hills District.

Ka pyntip ruh ba ia kane ka Ordinance kan sa sdang treikam hadien ba la ioh ia ka jingmynjur na u Lat ka Jylla.

“Hadien ka jingiakynduh ia ka Regulatory Committee kumta ruh yn sa buh ia ka dor bai klas, ka jingpyntreikam ia ka Reservation Policy bad ka jingai bhah ia ki seat katkum ki kyndon jong ka sorkar bad ki hukum jong ki iingkashari bapher bapher,” ong ka Myntri.

Haba kylli, kane ka Myntri ka la ong ba ka PA Sangma International Medical College jong ka University of Science & Technology, Meghalaya (USTM) kaba dei ka Medical College shimet kaba nyngkong eh ha ka Jylla kan sdang ban treikam noh hadien ka jingsoi jong u Lat ia ka Ordinance.

“Mynta ngi la ai ka jingmynjur bad yn shah ia ka USTM ba kan sdang treikam noh shen hadien ba la soi ia ka Ordinance da u Lat ka Jylla,” ka la bynrap.

Ka USTM kala pynbna ba kan buh ia ka bhah ba 40 seat na ka bynta ki samla pule ka Jylla na ki 150 tylli ki seat. Kane ka Ordinance ka long eh ban buh teh kyndon da ka ain ia ka jingtreikam jong kane ka jaka pule bad kan pynthikna ruh ba ki samla pule na Meghalaya kin ioh ia ka lad na ka bynta ka jingpynduna ia ka dor bai klas hapoh kane ka jaka pule.

Halor ka jinglong jong ka Shillong and Tura Medical College kaba la ap khmih lynti bha, ka Myntri ka la ong ba ka Sorkar Jylla ka la pynsted ia ki jingtreikam bad ki ban sdang ia ka jingpynrung klas MBBS naduh u snem 2025 bad 2026.

Ka Shillong Medical College kan sdang ia ka jingshim klas ia ki samla pule MBBS naduh u snem 2025-26 katba ka Tura Medical College kan sdang shim klas naduh u snem 2026-27.