Mynjur ka Sorkar pdeng ia ka song pisa ba 2000 klur ia ka Meghalaya na ka bynta ka MITP projek

Syllad | The Rising MeghalayaAugust 10, 2024

Ka Ministry of Finance ka Sorkar India ka la ai ka jingmynjur ia ka song jingiarap pisa kaba T.2000 klur na ka bynta ka jingshna ia ka surok bad ki jingtei jong ka bynta ne phase kaba ar jong ka Meghalaya Integrated Transport Project (MITP), kaba la tip kum ka Meghalaya Economic Growth Accelerator (MEGA) Corridor Project.

Kane ka song pisa kaba thymmai ka dei ka jingmih na ka jingseisoh ha ka jingpyntreikam ia ka phase kaba nyngkong jong ka MITP projek.

U Myntri Rangbah ka Jylla u Conrad K Sangma ha ka jingiakynduh ia ka Myntri Pla tyngka ka Sorkar Pdeng ka Nirmala Sitharaman ha ka 24 tarik u bnai Jylliew ba la dep, u la ai ai ka jingbatai halor kane ka projek bad pan shuh shuh ia ka jingkyrshan pisa.

Ha ka phase kaba nyngkong jong ka MITP la pyntreikam da ka jingkyrshan pisa kaba long T. 880 klur na ka World Bank. Hapoh kane ka projek la lah ban shna ia ki katto katne ki lynti surok ba kongsan kum ka Baejendoba-Resubelpara-Mendipathar-Damra, Shillong–Diengpasoh bad Pasyih–Garampani. Ka jngseisoh ha kaba pyntreikam ia kine ki projek ka la ioh pdiang ruh ka jingiarap na ka World Bank bad ka Ministry ka tnad Finance jong ka ri.

Hapoh ka phase kaba ar jong ka MITP (MEGA Corridor) Project, yn tei ia palat 300 km ki surok double lane kiba lah ban kyrda halor kano kano ka jinglong jingman jong ka suinbneng ki ban pyniasoh ia ka surok ba kongsan jong ka nongbah Shillong, Tura, Jowai bad Dawki.

Nalor kata la phaikhmat kyrpang ruh ia ki surok ha ka sorbah kiba pyniasoh ia ka New Shillong Administrative City bad ka New Shillong Knowledge City, da kaba pynkylla ia ka nongbah Shillong kum ka jaka jong ka roi ka par hapoh ka thain. Nalor kata yn kyntiew ruh ia kiwei pat ki kam pynroi kiba iadei bad ki jingtei kum ki industrial parks, warehouses, agro-processing center bad ki iew ki hat.

Na ka liang u Commissioner bad Secretary, Planning, Investment Promotion & Sustainable Development ka Sorkar Jylla lyngba u kyrwoh u la ong ruh ba haba shim kyllum lang kine ki jingdon jingem kin iarap ban kyntiew bad pynsted ia ka roi ka par sha ki thain kiba pajih, bad pynroi ia ka jingpyniasoh lyngba ki lynti surok ha baroh kawei ka jylla.

Kine ki jingiarap hapoh ka projek MEGA Corridor, ryngkat bad ki projek kiba dang iaid shakhmat kum ka surok Shillong Dawki (NH 106 & 206), ka surok Tura Dalu (NH 217), ka surok Phulbari sha Goeragre (NH 127B), ka jingkieng Dhubro-Phulbari kan plie ia ki lad ki lynti jong ka Jylla ha kaba pynkylla sha ka jaka pdeng bad ka ioh ka kot kaba khlain jong ka thain, kata da kaba phaikmat ruh sha ka thong jong ka ioh ka kot ka ban kynjoh sha ka USD 10 Billion kat haduh u snem 2028, u la bynrap.