Mynjur ki karkhana dewbilat ban siew 7 tyngka ka bai kit dewbilat, pdiang hun ka JHTOA

Syllad | The Rising MeghalayaNovember 11, 2021

Hadien ka jingiakhih pyrhshah jong ki trai trok hapoh ka lama jong ka Jaintia Hills Truck Owners’ Association (JHTOA) kaba la neh la bun bun bnai ban dawa ban pyntreikam iaka bai kit bai bah dewbilat thymmai, ki karkhana dewbilat ha rilum Jaintia kila hap ban pyndem bad mynjur pyntreikam iaka bai kit dewbilat haka dor T.7 shi metric ton shi kilometre hapoh jylla.

Kane ka bai kit bai bah thymmai kan treikam naduh 15 tarik u bnai Naiwieng.

U Nidamon Chullet, president JHTOA hadien ka jingialang jong ki trai trok kaba long haka Phramer haka sngi Palei, ula ong ka jingialang kaba la long haka 9 tarik une u bnai ki karkhana dewbilat hapoh East Jaintia Hills District kila kular ban pyntreikam ïaka bai kit bai bah T.7 tyngka shi metric ton shi kilometre kumba la pynbna ne pynmih hukum da ka sorkar Jylla haka 25 tarik u Nailur 2020.

Ula ïathuh ba kane ka dor kan treikam naduh ka sngi 15 tarik Naiwieng ha baroh kawei ka Jylla bad lada don kino kino ka jingeh haka kit ka bah ki lah ban pyntip sha u da kaba phone ha une u Number 7005082167.

Ula ïathuh ba katei ka jingialang bad ki nongiakam ka synjuk ki nongmih dewbilat ka Jaintia Hills Cement Manufacturing Association (JHCMA) kila kular bad pynbeit ba baroh ki karkhana kidei ban buh ïaki kudam ha Byrnihat bad la kular ruh ban pyndonkam da ki trok jong ki dkhot ka JHTOA ban kit dewbilat.