Mynjur ki nongialam shnong iaka jingpynheh pynmih dewbilat bad clinker ka Topcem

Syllad | The Rising MeghalayaAugust 25, 2023

Wat hadien ka jingpyrshah uba bun kumjuh na ki trai shnong jong ka Wahiajer, hynrei ki nongialam shnong jong ki lai tylli ki shnong ka Thangskai, Chiehruphi bad ka Wahiajer kiba hapoh ka Elaka Narpuh, East Jaintia Hills District kila mynjur iaka jingpyniar treikam bad pynbun jingpynmih dewbilat, clinker bad pynmih bording ka karkhana Meghalaya Cement Limited (Topcem) haka 24 tarik une u bnai Nailar.

Kane ka jingmynjur jong ki nongialam shnong jong kitei ki lai shnong ka dei hadien bala pynlong biang iaka jingialang ha hall jong kane ka karkhana hadien bala shah pynpra ka iing dara kaba la thmu ban long public hearing na ka jingpyni bor hadpeng u Pulit bad ka kynhun jong ki nongshong shnong ka thain Narpuh, ki sengbhalang kiba kynthup iaka KSU, HANM, JSU, HYC bad kiwei kiwei.

Kane ka public hearing ka dei na ka bynta ka jingpynheh par maw clinker na ka na ka 2600 TPD sha ka 4500 TPD bad ka 10 MW Captive power plant bad 9.5 MW WHRS ne waste heat recovery unit.

Ki pulit ban pynpra ia u paidbah bhur kila pyndonkam da ki lathi, ther lyer pynsat khmat kaba la wanrah iaka jingmynsaw ki pulit bad ki paidbah kumjuh.

Nakaliang ki Pulit kila kam bad ki don 9 ngut kiba mynsaw bad halor kane ka jingklumar kila register ruh iaka case katkum ka case nomber 45(08)2023 hapoh ka kyndon aiñ 143/144/145/148/152 IPC ha Lumshnong Police Station bad ka jingtohkit kala iaid shakhmat.

Haba kren bad u organizing secretary ka Voice of the People Party u Damewanhi L Rymbai ula pynrem ia kane ka jingjia bad iaki bor pyniaid District jong ka East Jaintia Hills, ka Meghalaya State Pollution Control Board, ki heh ka Meghalaya Cement Limited bad pulit halor ka jingthombor jong ki namar naduh ba sdang kila khang lad ia u paidbah ba pyrshah ban rung sha ka public hearing.

Katba na kaliang ka karkhana kila kynnoh ba ki don tang katto katne kiba pyrshah bad kiba don jingthmu ban pynklumar ryngkat kiba nabar.

Ha kane ka jingpynsngew paidbah ba la pynlong hapoh ka Community Hall, la don lang u Additional Deputy Commissioner ka East Jaiñtia Hills, u Bah G Warjri, ki ophisar na ka State Pollution Control Board, ki heh ka karkhana bad ki nongkyrshan. Ki paidbah kiba la don ha kane ka kamra, ki la ïa rah kti lut ban pynpaw ïa ka jingkyrshan ïa kitei ki jingthmu jong ka karkhana.

U Bah Warjri ha ka jingïakren bad ki lad pathai khubor u la ong, “Ha kane ka jingpynsngew paidbah, ngi la ïoh ban pynsngew halor ka jingthmu jong ka kompani. Ngi la ïohsngew ïa ka jingpynsngew na ka liang ka kompeni bad hadien kata ngi la khot ïa ki briew ba kin ai kano kano ka jingpynsngew kat kaba ki don katkum ka jingsngew jong ki. Katto katne ki la wan ban ai jingkren bad ngi la buh rekod lut baroh.”