Mynjur ki nongshong shnong ban seng shnong iaka Yiengkieng Myntdu ha Jowai

Syllad | The Rising MeghalayaMarch 26, 2022

Ka jingangnud jong ki 35 tylli ki longïing kiba shong ba sah ha Yiengkieng Myntdu ban seng shnong kala ioh iaka jingmynjur haka Dorbar Elaka jong ka Elaka Jowai ban ithuh noh ïaka kum ka shnong ‘Myntdu’ haka sngi Saitjain.

Kane ka jingïalang paidbah ka Dorbar Elaka Jowai kala long ha phyllaw ïing ka Kong Simple Jones Pakynteiñ ha Yiengkieng Myntdu, Elaka Jowai ba la khot da u Dolloi Elaka Jowai kaba la wan ïashim bynta da ki nongshong shnong bad ki trai jaka ba don jaka ha kane ka kyntoit.

Kane ka shnong Myntdu ka kynthup ïaki nongshnong shnong kiba don ha Liar Kam Kam, Jingkieng Myntdu bad kiwei ki nongshong shnong ba marjan.

Ki jingbun briew ha kane ka kyntoit Myntdu ka long 207 ngut kynthup 112 ngut ki kynthei 95 ngut ki shynrang, ki nongshong shnong kiba la dap 18 snem shaneng ki kynthei ki long 67 ngut ki shynrang 62 ngut bad baroh ki nongshong shnong ki don 35 longïing.

U pud sawdong jong kane ka kyntoit ka long na Mihsngi-Dorbar shnong Caroline Colony, na Sepsngi-Wah Mynkrem, na Shatei- Lair Kam Kam, na Shathie-Dorbar shnong Tympang Ïawmusiang.

Hashwa ban shim iaka jingmynjur, u Dolloi ka Elaka Jowai u Ma Puramon Kynjing, ula ïathuh ba ïaka shithi jingpan shnong thymmai ki nongshong shnong ba shong ba sah ha Liar Kam Kam Yiengkieng Myntdu, ka Elaka ka la ïoh pdiang naduh ka 26.11.2021 bad naduh katei hi ka sngi la pynbeit ban pynlong ïaka jingïalang paidbah namar ki nongshong shnong ki don ka hok ban pynsngew ïaka nongrim bad jingangnud jong ki.

Katkum ka shithi, la sdang ïaka ha u snem 1968 bad mynta ki la sngew donkam ban ïoh noh ïa la ka jong ka dorbar shnong kaba pura bad ki la leh shibun ki kam ban wanrah ïaka jingmyntoi haka poh shnong pohthaw kynthup naduh ka jingpynbha pynmiat ïa kane ka jaka ki ïarap bad ki la ai ka jingkyrshan haki jingeh khamtam haka por ka khlam COVID-19.

Hadien ka jingkren u Dolloi la ailad ïaki nongshong shnong ban pynsngew ïaka jingkyrshan ne jingpyrshah jong ki ban seng ïaka shnong thymmai bad baroh ki paidbah ki la mynjur ban thaw noh ïa kane ka shnong ba thymmai.

Katkum aiñ seng shnong ka District Council hapoh Section 20 Clause 2 (a) jong ka Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015 ba tang hapoh 20 iing bad 50 ngut ki riew rangbah la lah ban seng shnong.

Kumta u Dolloi ka Elaka Jowai ha kane ka jingialang paidbah ula ong ba un rah ia kane ka mat sha ka konsil ban pynsngew iaka jingangnud jong ki nongshong shnong kane ka kyntoit.