Mynjur u Lat ia ka Khyrim Syiemship Act 2024; ka Shad Nongkrem ka ban sah kynmaw: Pa’iem Balajied

Syllad | The Rising MeghalayaNovember 13, 2024

Ka Shad Nongkrem 2024 kaba la kut noh hynne ka sngi 12 tarik Naiwieng ka la long ka sngi ka ban sah jingkynmaw ia ka Hima Khyrim ha kaba ka la don ia la ka jong ka aiñ bala tip kum ka Hima Khyrim Act 2024 ïa kaba la mynjur da u Lat ka Jylla u CH Vijayashankar uba la ïadonlang bad pyllait paidbah ruh ïa kane ka aiñ ha ïingsad jong ka Hima Khyrim ha Smit.

U Lat ka Jylla u la mynjur ia kane ka ain hadien ba ka Khasi Hills Autonomous District Council (KHADC) ka la pass ïa ka Bill ha ka 12 tarik Lber 2024 bad ha ka 11 tarik Naiwieng 2024, ha kaba la pynbna ha ka Meghalaya Gazette ba la pynlong aiñ ïa katei ka Bill ba la pass da ka District Council.

Ha kane ka sngi la wan sakhi ruh da u Symbud Myntri Rangbah ka Jylla u Bah Sniawbhalang Dhar, Chief Justice ka ïingbishar ba donburom ka Meghalaya High Court u Indra Prasanna Mukerji, u Myntri ka tnad Arts and Culture Bah Paul Lyngdoh, u Chief Executive Member ka KHADC u Bah Pynïaid Sing Syiem, u Symbud CEM Bah PN Syiem, u Pa’iem ka Hima Khyrim Dr. Balajied Sing Syiem, ki MLA, MDC, ki Bakhraw, ki Lyngdoh bad kiwei kiwei.

U Bah Pynïaid Sing Syiem haba kren sha ki lad pathai khubor u la ong ba ka jingïoh jong ka Hima ïa ka muhor ka long ban nang pynskhem ïa ki riti ki distur bad ban ym don shuh mano mano ruh ba lah ban pynkhih ïa ka jingleh niam leh rukom jong ka Hima.

Na ka liang u Pa’iem Dr Balajiedsing Syiem u la pynpaw ka jingsngewkmen hadien ba u Lat ka Jylla u la ai ïa ka muhor kaban long ka jingkyrkhu ïa ka Hima khamtam ha kaba ïadei bad ka kam synshar ka khadar, ka riti ka dustur bad ka lehñiam leh rukom jong ka Hima.

Ha kane ka lehniam bad Shad Pomblang 2024 kaba la tip kum ka Shad Nongkrem ka la long kaba iphuh iphieng ba shongkun ha kaba la sdang da ka jingshad ba la wan ïashim bynta shitrhem ki nongshad kynthei bad shynrang bad bud pat sa ka jinglehñiam Pomblang.