Mynsaw 5 ngut ba leit rat ka trok ia ka Alto haka surok bah NH-6 ha Khapmara, Ri Bhoi

Syllad | The Rising MeghalayaJune 16, 2024

Ki jingjia tyngkhuh kali ki la bteng ban iai jia na ka por sha ka por ha ka surok bah National Highway 06 ha Ri Bhoi District, ha kaba ha ka jingjia kaba la jia ha ka step 16 tarik mynta u bnai san ngut ki briew ki la ngat ha ka jingmynsaw hadien ba kawei ka kali Alto 800 ka la shah tynrah ha kawei ka trok ha ka surok bah Shillong Bypass ha Khapmara.

Ha kane ka jingjia kaba la jia ha ka por kumba 5:30 mynstep la ong ba u nongniah jong katei ka trok kit mar kaba don ia u number NL-01-AE-5956 u la phet krad ia lade hadien ba u la leit tynrah ia katei ka Maruti Alto 800 kaba don ia u registration number AS-01-AY-5489 kaba la niah da u Bah Rodina Janong (26) kat haduh ba kane ka Alto ka la jubor phom bad wanrah ka jingmynsaw ia ki briew kiba shong hapoh jong ka.

Katkum ki jingtip ba la ioh la ong ba nalor u nongniah, kiwei pat kiba la mynsaw ha kane ka jingjia ki kynthup ia u Jermi Shullai (27) uba dei na ka shnong Wahthapbru, u Eric Mawlieh (25), Tremiki Suting (26) na Qualapathy Shillong, u Edmund Nonghulu (28) na Lumdiengjri bad u Francis Pde (28) na Lama Villa, Shillong.

Hadien kane ka jingjia ki bor pulit ka Ri Bhoi la iathuh ba ki la pynkit noh mar mar ia kine kiba la mynsaw shapoh CHC Bhoirymbong na ka bynta ban ioh jingsumar bad ong ruh ba kine baroh ki la mynsaw tang malu mala ha kane ka jingjia.

Halor kane ka jingjia ka jingtohkit ki pulit kala iaid shakhmat.