Mynsaw jur 3 ngut ba leit tynrah ka alto nadien ka trok ha Umdihar

Syllad | The Rising MeghalayaOctober 24, 2024

Lai ngut ki briew ki la ngat ha ka jingmynsaw jur hadien ba ka kali Maruti Alto kaba ki shong bad kaba la pynher sted bha ka la leit tynrah beit beit nadien jong kawei ka trok kaba pynieng harud surok bah NH-06 ha Umdihar, Ri Bhoi District.

Katkum ka khubor la iathuh ba kane ka jingjia ka la jia hynne ka step 24 tarik u Risaw ha ka por 5:40 eiei, ha kaba kawei ka kali Maruti Alto kaba don ia u number ML 05 W 5094 kaba la pynher sted bha ka la pynlong ia u nongniah ba un ym lah shuh ban tehlakam kaba la pynlong ia kane ka kali ba kan leit tynrah shwa ia u divider bad hadien ia kawei ka trok kit mar kaba don ia u number AS 01 DD 9728 kaba dang ieng harud u surok bah NH-06.

Ha kane ka jingjia lai ngut kiba shong ha kane ka Maruti ki la ngat ha ka jingmynsaw jur, kata kaba kynthup ia u nongniah uba la tip kyrteng kum u Kynrong Dkhar, Rep Dkhar bad u Kharlong Dkhar kiba dei na ka shnong Wapung, East Jaintia Hills District.

Na ka liang ki pulit ka Nongpoh Traffic Branch ki la leit mar mar sha katei ka jaka ha kaba la pynkit noh ia kine kiba mynsaw sha Nongpoh Civil Hospital, hynrei namar ka jingmynsaw jur la pynkynriah noh sha Super Care Hospital, Shillong.