Mynsaw jur 4 ngut na ka jingbthei ka dukan lum tiar jot ha Keating Road

Syllad | The Rising MeghalayaOctober 1, 2023

Saw ngut ki briew kila ngat ha ka jingmynsaw jur na ka jingbthei ki tyndong rong (Spray Can) hapoh kawei ka dukan buh tiar jot (scrap) ha Keating Road, Shillong haka Sngi U Blei ha ka por kumba 1 baje nohphai sngi.

Napdeng kine ki saw ngut ar ngut ki dei ki nongtrei jong kane ka dukan scrap bad arngut kiwei pat ki dei kiba dang shong hapoh kawei ka dukan khap shniuh kaba don markhap. Hadien kane ka jingjia mar mar na ka liang ki bor pulit na ka tnat bomb squad bad ka kynhun ki ksew K-9 ha ryngkat ki kali pynlip ding ki la wan poi mardor sha kane ka jaka ban tehlakam ia ka jinglong jingman baroh.

Na ka liang u Superintendent of Police ka East Khasi Hills u Bah Sylvester Nongtnger u la ong ba kane ka jingbthei ka la wan jia na ki tyndong spray kiba kloi ban kem ding ha ka por ba kine ki nongtrei ki dang pynpait ia ki ha ryngkat ka dih sikret hapoh kane ka jaka kaba khapngiah. Kumta ka long mynta na ka liang ki pulit ki la lah ban tehlakam ia ka jinglong jingman baroh.