Mynsaw u briew ba shah siat ha u CRPF uba pyrshang pynsangeh ia ka kali 

Syllad | The Rising MeghalayaApril 3, 2025

Uwei u briew u la ngat ha ka jingmynsaw hadien ka jingioh siat bakla da uwei u CPRF da ka suloi AK katba u dang pyrshang ban pynsangeh ia kawei ka kali kaba thmu ban tynrah ia ka kynhun kiba ap pahara ha ka por mynmiet ha Mendipathar, North Garo Hills district. 

Kane ka jingjia kaba la jia ha ka miet jong ka 2 tarik Iaiong ka la wan long hadien ba ka kynhun ki bor pahara na Mendipathar police station bad ki dkhot ka CRPF ki dang pynlong ka jingpahara hakhmat ka dukan Pushpa Cloth Store hajan ka surok lailad ha iew Mendipathar hadien ba la wan mih kynsan kawei ka li rong lieh kaba don ia u nombor AS 01 AM 7750 kaba la pynher sted bha na ka liang ka Mendipathar PS bad pyrshang ban tynrah ia ki CRPF kiba shong hakhmat katei ka dukan.

Haba iohi kynsan ia ka jingma, kine ki CRPF ki la phet krad mardor na kane ban pyllait im ia lade bad hadien ki la pryshang ban tur shajan katei ka kali. Hynrei, u nongniah jong kane ka kali u la tur biang bad pyrshang ban phet na kane ka jaka, ong ka khubor pulit.

Hapdeng ka jingher syrngiew ki bor pahara ki la pyrshang borbah ban pynieng ia kane ka kali, hynrei u nongniah u la pyrshang ban phet krad. Ban iada ialade uwei u CRPF u la pynap da ka suloi bad pyrshang ban plie ia ka jingkhang jong ka kali. Hynrei, katba u dang plie ia ka jingkhang ka kali une u nongniah ula pyrshang biang ban pynher ia ka kali ban phet krad. Katba kane ka kali ka dang ialeh ban iaid kynsan ka suloi AK ka la bthei kynsan bad dei na ki lbong jong uwei pat uba la ia don lang hapoh kane ka kali uba kyrteng u Neobirth R. Marak 28 snem rta uba dei na ka shnong Thapa Darenchi.

Hadien kane ia une uba la mynsaw kumjuh ia u nongniah jong ka kali uba kyrteng u Sengrim K. Sangma uba dei na ka shnong Thapa Darenchi la pynkit noh sha Mendipathar PHC na ka bynta ban aijingsumar.

Katkum ka medical report la ong ba u Neobirth ua la don hapdeng ka jingshoh khawiang bad ba um lah shuh ban tehlakam ia lade namar ka jingmynsaw, bad hadien la phah noh ia u sha ka jaka sumar kaba kham biang.

Katkum ka medical report la ong ba u Sengrim um shym la ngat ha ka jingmynsaw hynrei u la dih kyiad palat pud, ong ki pulit kiba la ioh ruh ban kurup ia ki bilor kyiad napoh katei ka kali.

Na ka liang ki pulit ki la pynkhreh ban shim ia ki sienjam kiba tyngeh pyrshah ia kine ki briew.