Mynsaw u VP ka NEHUSU na ka jingiakynad ha ka jinglehkmen Holi ha NEHU, dawa tohkit ka ABVP

Syllad | The Rising MeghalayaMarch 25, 2024

Arngut ki briew kaba kynthup ia u Vice President ka North Eastern Hill University Students Union (NEHUSU) ki la ngat ha ka jingmynsaw na ka jingiakynad kaba la mih na ka jinglehkmen Holi hapoh campus jong kane ka skulbah haka 25 tarik Lber.

“Arngut ki briew ki la mynsaw bad la ujor artylli ki ejahar.Ia kine la pynkit noh shapoh Civil Hospital, Shillong,” ong u Superintendent of Police ka East Khasi Hills District, u Rituraj Ravi.

Haba iakren lyngba ka phone, u Finance Secretary ka NEHUSU u Bah Mandor Diengdoh u la ong ba u Vice President jong ka Union u Easterson Sohtun u la ngat ha ka jingmynsaw ha kane ka jingjia.

“Na ka liang u Vice President u la pynpaw pyrshah ban pynlong ia ki prokram da kaba shah ia ki briew kiba nabar ba kin leh ia ki kam pynbitar pyrshah ia ki samla pule jong ka University hadien ba u la shah thombor ha ki,” u la ong.

Haba kylli, u Diengdoh u la ong, “Ka dei ka prokram ban rakhe ia ka Holi.Kam don jingktah lada la rakhe da ki samla pule ka NEHU, hynrei mynta ki briew kiba na bar ki la wan bad pynbitar ia ki samla pule lyngba ki jingleh jong ki.”

U la ong ruh ba ka NEHUSU ka la ujor da ka FIR pyrshah ia ki dkhot jong ka Akhil Bharatiya Vidyarthi Parishad (ABVP).

Ha kawei pat ka bynta, na ka liang ka ABVP, Shillong Unit ka la pynrem jur ia u Vice President ka NEHUSU halor ka jingkynnoh khlem nongrim pyrshah ia ka Seng.

Haba pynpaw halor kane, u Joint Secretary ka ABVP ka jylla u Bah Bomsing Khongtir u la ong, “Lah ban kdew ba ha ka 25 tarik Lber 2024, ka World Organisation of Students and Youth (WOSY), ka la pynlong ia ka prokram jingiakynduh lang ban ialehkmen Holi hapoh ka campus ka NEHU. Ki dkhot ka ABVP ruh ki la shah khot sngewbha ban wan sha kane ka jingialehkmen. Ka WOSY ka la khot ia kane ka jingialang shibynta ban iasam lang halor ka kolshor hapdeng ki samla pule bad ban leh burom ia ki samla pule bar ri ka NEHU ha kane ka prokram.”

“Kane ka prokram ka la long kaba iaid beit iaid ryntih tad hadien ba u VP ka NEHUSU u la thmu khnang ban pynthut ia ka suk ka sain da kaba ktah kti ia ki katto katne ki samla pule ka University ia kaba u la sylla da ma u lem bad ki paralok jong u,” u la ong.

Nalor kata u la ong ba ka ABVP Shillong Unit ka la dawa ban pynlong ia ka jingtohkit kaba bniah halor kane ka jingjia bad pynthikna ruh ban ai ka jingiatreilang bad ka Tnat pulit ha ka por ba ka jingtohkit ka dang iaid shakhmat.

“Kiba kum kine ki kam leh riewkhlaw ki dei ki bym lah ban pdiang hapoh ka university.Ka ABVP Shillong ka dawa ban pynlong ia ka jingtohkit ka bym shah liang halor kane ka jingjia,” u la ong shuh shuh u Jt Secretary ka ABVP.