Mynta u snem kadei ka nem sniew ïa u nongrep

Syllad | The Rising MeghalayaOctober 27, 2019

JOWAI: Kane ka por kadei ba ki nongrep ki don ïaka dur khmat kaba phuh samrkhie namar ba kadei ka aiom ban ot ïa u soh kba, hynrei ka jngtrei shitom jong ki baroh shi snem la wan theh umpjah noh da u slap uba la ther jur bha ha kine ki lai sngi kiba la dep.

Bun tylli ki hali kila twa bad u kba u khaw uba la ih bha uba la dei por sa tang ban lum noh u la lwet lut hadien ka jingwan ka umsaw kaba tap bad pyn julor bha u kba bad don u ba sah  sa tang u  jyntang kba ne skum kba.

Kane ka jia ha kiba bun ki bynta jong ka West Jaiñtia Hills District, kata naduh na sor Jowai ha ki bynta jong ka Pynthor Nein bad Pynthor Wah kiba don harud ka Wah Myntdu, ka pynthor Litang bad kumjuh ka jaka rep ha Ialong, kiba don ha harud ka Wah Myntdu bad kiwei kiwei ki shnong kum ka Shangpung bad ki shnong ba marjan.

“Ka jingther u slap ha kine ki lai sngi  kala wanrah ka jingjulor kaba bun ïaki paid nongrep ka shnong Ialong bad haduh 30-40 tylli ki longïing kila shah ktah ha kaba u kba u khaw jong ki ula julor lut,” la ong u Ma Bishar Shylla, Waheh Shnong Dorbar Shnong Ialong.

Kane ka jia long namar ka jing heh ki um ki wah kumjuh ka jingwan ka umsaw na ka Wah Myntdu bad kala wanrah ka jingjulor kaba bun hadien ka jingtwa ki hali bad ka jingshah tap u kba haka umsaw bad ka jingshah rong noh u kba uba la dep khum uba la dei ban lum sha ka thiar, la ïathuh u ma Bishar.

U wei pat u nongrep u Ma S Pakynktein uba rep ha Pynthor Nein, Jowai ula ïathuh, ula ong “Mynta u snem kadei ka nem sniew namar baroh u kba uba la ih bha uba dei sa tang ban lum noh sha ka thiar u la lwet lut bad sah sa tang u  jyntang kba hadein ba ka umsaw kala wan ban tap bad rong ia u kba