Myntoi da ki spah ngut kiba shah hikai computer ha Ramakrishna MVCC, Shillong

Syllad | The Rising MeghalayaApril 7, 2024

Ia ka Convocation kaba 104 jong ka jingai jinghikai computer lyngba ka Ramakrishna Mission Vivekananda Cultural Centre, Shillong la pynlong ha ka 4 tarik mynta u bnai ha ka auditorium jong ka Ramakrishna Mission Vivekananda Cultural Centre ha ka jingiadon lang u Anindya Banerjee, u nongthoh kot ba pawnam kum u Kongsan.

U Banerjee ha ka jingkren u la pynpaw ka jingkmen kaba khraw ba ki samla pule ki la lah ban pyndep ia ka bynta wat hapdeng ki jingeh ba ki iakynduh namar ka jingdon ka eksam ka jong ki. U la ban jur ruh ba watla baroh ki angnud ia ka jingjop ha ka jingim, hynrei kidei ban kynmaw ba ka lynti sha ka jingjop ka shong ha ka jingtei ia ka jinglong.

Ia ka statistical data jong ka resol la peit bniah da u Brahmachari Vairagyachaitanya, Director (Academics) jong ka Ramakrishna Mission Vivekananda Cultural Centre uba la pyntip ba ki la don kumba 462 ngut ki shah hikai ha kane ka bynta ai jinghikai bad ba 373 na ki ki la ioh ia ki certificate.

Ha ka jingai jingkren u  Br Vairagyachaitanya u la pdiang burom ia baroh kiba la wan iashim bynta, kaba long ruh ka bynta kaba 104 jong ka jingai jinghikai Computer bad ka bynta ba 42 jong ka jingai jinghikai ha ka ktien Phareng. U la pyndon burom ia u Swami Vivekananda, bad kren shaphang ka jingktah jong ki kam jong u ha ka jingiakhun ka India ban ioh ia ka jinglaitluid. U la kren shaphang ka jingkongsan jong ka jingioh jingnang jingstad baroh shi jingim.  Ha u snem 2022, ka institute ka la sdang ia ka jingai jinghikai ha u bnai Rymphang, bad ki la sakhi ka jingbun kiba wan ioh jinghikai. U la kyntu ia ki shah hikai ban pynkylla ia ka jingnang jingstad jong ki sha ka kam, kyntiew ia ka jingseng kam lajong. Haba kren shaphang ka jingtrei borbah jong ka institute ban ai jinghikai, u la pynbna ka jingsdang ia ka jingai jinghikai Data Entry Operator.

Ka khusnam kaba shongdor tam kaba long ka jingai ia ka kor computer, ka la leit sha ka Shakorika Das bad Prahlad Dutta. La ai ruh ia kiwei kiwei ki khusnam kum ki Session Topper, Best Project, bad Best Personalities sha ki shah hikai. Ki samla pule kiba la wan shakhmat kilong: ha ka Computer-Beginner: ka Rikynti Lyngdoh, Computer-Intermediate: ka Zephyrlyne Deibameai Lyngdoh, Computer – Accounting: ka Khanchui Jajo, DTP (Part I): ka Iarilang Lyngdoh Nonglait, bad u Ronan Youroi na kiwei kiwei ki jingpule ba kham halor.

Hashuwa kane ka prokram, ha ka jingkren pdiang sngewbha, u Swami Divyaswarupananda Maharaj, Centre-In-Charge, u la kren shaphang ka jinghikai jong u Swami Vivekananda kaba pynshlur ia ngi ba ngin trei na ka bynta ka jingbha jong ka pyrthei. U la kyntu ia ki samla pule ban pyndonkam ia kine ki jinghikai ba ki la ioh ban pynurlong ia ki jingngnud jong ki bad ban nohsynniang sha ka jingkyntiew ia ka imlang sahlang.

Na ka liang ki nonghikai baroh, u Bah Tyrchain Phawa bad ka Suparna Choudhury ki la ai khublei ia baroh ki samla pule bad ki la pynshlur ba kin bteng ia ka jingpule jong ki ha ka IT.Ia kane ka prokram la pyniaid da ka Kong Iairikynti Rynjah.