Na Chilliangraij UP School sdang ka Fit India School Week ha Jowai

Syllad | The Rising MeghalayaNovember 26, 2021

Ka Ministry of Education, Department of School Education & Literacy jong ka Sorkar India kum shibynta ka prorkram Azadi Ka Amrit Mahotsav ne jinglehkmen iaka jingdap 75 snem ka jingioh laidluit ka Ri kala pynlong iaka Fit India School Week kaba la ailad ïaki skul ban pynlong ïa kane ka prokram naduh ka 14 tarik Naiwieng bad pynkut haduh 12 tarik u Nohprah 2021.

Ka Chilliangraij SSA Upper Primary School, Jowai haka 25 tarik Naiwieng ka la sdang ban pynlong ïaka Fit India School Week.

Kum ka dak ka jingsdang ïa kane ka prokram ka la don ka jingïalang lyngkot ba la pynïaid da ka Kong Handakaru Ïakai Head Teacher ryngkat ka jingsakhi lang ki longkmie kiba dei ki dkhot jong ka School Managing Committee.

Ka Kong Handakaru Ïakai Head Teacher kala ong baka jingthmu jong ka Fit India School Week ka long ban pynshlur iaki iaki khynnah ban long kiba ïeid ïaka met ka phad lajong bad ba kin imsngi im-miet da kaba pynbyrngia haki kam kiba bha khamtam ban ïashim haki jait jingïalehkai na bynta ban ïoh ïaka met ka phad kaba koit ba khiah.

U Oriland Shylla, General Secretary Dorbar Chnong Chilliangraij haka jingkren ula kyntu ïaki khynnah ban pynleit jingmut bad ban pyntreikam ïa kino kino ki jinghikai ba ki la ïoh na ki por sha ki por lyngba ki nonghikai bad ki riew shemphang.

Haba ïadei bad ki prokram bapher bapher kiba ki bor sorkar na Delhi ki la phah ula kyntu ban shimkhia namar ka jingshimkhia ka pynmlien haki kam babha bad ïarap ruh ban saindur ïaka longbriew manbriew kaba bha ba miat bad kaba koit bakhiah.