Na ka daw bym biang bor pyrkhat lah ban lait jingpynsaja uba pynbudnam ïa u Archbishop

Syllad | The Rising MeghalayaOctober 16, 2019

JOWAI: Imat u Rimialson Daw uba la pynthoh bria pynbudnam ia ka long rynieng bad burom u Archbishop Dominic Jala (uba la khlad noh shen) un sa lait noh na kano kano ka jingshah pynshitom jong ka aiñ hadien ba kiba haiing jong u kila kam bad u don jingduna ha ka bor pyrkhat pyrdain.

Kane ka long katkum ka khubor bala ioh lum na ki tyllong khubor jong ki pulit ha Jowai Police Station namar hadien ka jingshah rah tohkit ia u Rimialson Daw da u Deputy Superintendent of Police (Hqrs), Jowai ki bahaiing bahasem jong utei u briew ki la kam ba u Rimialson u dei u briew ba duna ka bor jingmut jingpyrkhat bad u dang don ha ka jingsumar.

Ka tyllong khubor ka iathuh ba ki pulit ki la rah ia u Rimialson Daw hadien ba ki la ioh pdiang ia ka jingujor na u Bah Richard Syiemiong hynnin ka sngi.

Katkum ka jinglum jingtip jong u Syllad u Rimialson Daw u dei u briew u ba na ka Shnong Lumtrep, Nongjngi bad u dei u briew uba la pyndep ia ka jingpule Pharmacy na ka Principal K M Kundnani College of Pharmacy, Mumbai, Maharastra.

U Daw ula kynthoh ha  ka account Facebook jong u ba U Archbishop Dominic Jala um dei shu uba sotti bad uba khuid bad ki long ki jingthoh kiba ktah mationg ia jinglong khuid suba jong u Archbishop.

Ha jingujor pyrshah ia u Daw,  u Bah Richard Syiemiong u la dawa ia ki bor ka aiñ ban pynshitom ia u katkum ki kyndon ain kiba tyngeh namar ba u la pynbudnam ia u Archbishop Dominic Jala.

U la ong ha ka FIR ba u Daw ula pynsngewsih ia ki riewngeit Katholik baroh bad pynkthang mynsiem ia ki khamtam ha kane ka por ka jingsngewsih namar U Archbishop u dang khlad shen.

U Daw u la shahkem ha u snem 2012 ba u byrngem ia i ka MLA jong Shillong East ka kong Ampareen Lyngdoh hynrei u la lait noh halor jingshem ba u dei u briew uba don jingduna ka bor pyrkhat pyrdain.

Haba tohkit bniah ia ki Facebook Account bad Instagram jong u Rimialson Daw, la shem ba u la u buh shibun tylli ki dur jong ka Aishwarya Rai, Ameesha Patel, Katrina Kaif ki actress Bollywood bad ki jingkren beiñ ia U Prime Minister ka Ri India U Narendra Modi.

U Moonlight Daw u para jong jong u Rimialson ula kam ba u Rimialson u dei u briew u ba jingduna haka bor jingmut jingpyrkhat kaba la tip kum ka Schizophrenia bad u dang shah sumar ha MIMHANS.

Ula ong ba nakaliang ka ïing ka sem jong ki halor kane ka jingthoh pynbudnam u Rimialson ïa u Archbishop Jala sha ki lad pathai khubor, ki pan map na baroh kiba u Rimialson Daw ula pynsngewsih da ka jingthoh  kynthoh sha facebook.

U Superintendent of Police West Jaiñtia Hills Disrtict Bah Lakador Syiem ula ong ba halor kane ka jingkam kiba haiing hasem jong u Rimialson u dei uba duna haka bor pyrkhat kin hap ban phah pynthikna ha ki briew kiba shemphang bad ka jingtohkit kala iaid shakhmat.