Na ka DGP pan jingkyrshan ka VDPCNA ban iakhun pyrshah ia ki kam bymman

Syllad | The Rising MeghalayaNovember 1, 2024

Ka Village Defence Primary Committee Nongstoin Area (VDPCNA) ka la kyrpad ia ka jingtuklar lem ka Director General of Police (DGP) ka Kong Idashisha Nongrang halor ki jingeh kiba ki iakynduh ha kaba iarap lem ia ki bor pulit ban tehlakam ia ki kam bymman bad ban pynneh pynsah ia ka shongsuk shongsain hapoh ka thain.

Ka kynhun na ka VDPCNA ka la aiti ruh da ka dorkhas halor kane ka phang sha ka DGP ha ka jingiakynduh kaba la long ha ka 31 tarik u Risaw hapoh police headquarter.

U president ka VDPCNA u Bah Mawkordor Kharsyiemlieh u la ong ba ka Committee ka la iakynduh ia shibun ki jingeh naduh ba la seng ia ka ha u snem 2019.

U la ong ba ka VDPCNA ka la trei borbah na ka bynta ban pynduna ia ki kam bymman hapoh ki thain ki jong ki bad ki la ai ruh ka jingiatreilang kaba pura bad kaTnad pulit ka West Khasi Hills ban kem ia ki riew runar.

“Ryngkat ki bor pulit ngi la pynlong ruh ia ki jingiaid pahara ha ki jaka iew Nongstoin, ha surok bah NH bad ki thain Bypass kiba dei ki jaka kiba ju kham mih ki huri hura. Hynrei, wat hadien ka jingpyrshang borbah ka jong ngi, hynrei ki don katto katne ki kam bymman kiba dang iai bteng,” u la ong.

Ha kajuh ka por haba kyrpad ia ka jingdonkam ban pyllait ia ki dkhot ka VDP na ka bynta ki kam leit ai sakhi, u Bah Kharsyiemlieh u la ong, “Haba ki dkhot ka VDP ki ioh ban kem ia ki nongkhaii drok lane kyiad bad aiti ia ki sha ki pulit, ki dkhot jong ngi ki ju shah khot kum ki sakhi halor kine ki jingjia. Kane ka jingdonkam ka buh ha ka jingeh namar ki dkhot jong ngi ki dei ki volunteer kiba hap ruh ban beh sha la ki jong ki kam ki jam na ka bynta ban kyrshan ia la ki iing ki sem. Kumta ruh ngi kyrpad jur ba dei ban pyllait ia ki dkhot jong ka VDPCNA na ka jingleit long kum ki nongai sakhi bad ba ka Tnad pulit kan shim ia ki sienjam kiba donkam ha kaba iadei bad kane ka phang.”

Nalor kata u la ong ruh ba ka Committee ka kyrpad ruh ban pynioh noh da ki uniform na ka bynta ki dkhot ka VDPCNA khnang ban pyniapher ia ki dkhot jong ki na ki riew paidbah bad khnang ba kane kan pynshlur ruh ha ka por ba ki pynlong ia kino kino ki jingleit khynra.

Ka Committee ka la kyntu ruh ia ka DGP ba kan khmih ruh ha kaba iadei bad ka jingpynslem ban pyllait ias ka honorarium sha ki dkhot ka VDP. “Kiba bun ki VDP unit ha ki shnong ki thaw ki dang ap na ka bynta ban register naduh u snem 2010, kaba la khanglad ia ki ba kin ioh pdiang ia ki honorarium, ki tiar ki tar ba la ai da ka Tnat pulit,” ong u nongialam ka VDPCNA.

Shuh shuh haba pynpaw ba ka VDPCNA ka la kut jingmut skhem ban ialeh pyrshah ia ka jingdih drok, jingdih kyiad ha ki jaka paidbah, ki jingiashoh ia dat bad kiwei pat ki kam bymman kiba ju jia ha ki bynta pdeng jong ka sor Nongstoin, u la ong, “Ngi la tyrwa na ka bynta ban pynlong noh ha ka jingiaid pahara miet man ka sngi ha ki surok sor Nongstoin, ban pyndait da ki CCTV camera bad ban pyrkhing tyngeh ia ki kam die kyiad beain.