Na ka jingtorti ka PWD iap hap kali u Dr Shylla

Syllad | The Rising MeghalayaDecember 7, 2022

Namar ka jingtorti bad ka jingbym khein snep ka tnad PWD iaka jingshngain ka leit ka wan u paidbah kala wanrah iaka jinghap kali kaba la wanrah iaka jingduh noh iaka mynsiem u Dr Sanjoy K Shylla.

Kane ka jingkhlad u Dr Sanjoy K Shylla kala jia haka shnong Iongnoh hadien ba ka kali jong u, ka Mahindra XUV 300 kaba don u registration Number ML 05 X 4578 kala hap shabar ka surok bad thung baji hynne ka nohphaisngi ha shuwa ban poi ka shnong Iongnoh, West Jaintia Hills District.

Kane ka surok ka dei kaba la shu ieh da ka tnad PWD khlem maramot naduh ba ka twa ha kane ka aiom lyuir kaba la dep. Ia kane ka surok la shu ieh khlem da buh kino kino ki dak ki shin ban iaid ban ieng ki kali motor ne kdew iaka jingma jong ka surok.

U Dr Sanjoy K Shylla udei uba na ka shnong Wahiajer, u trei ha Khliehriat Civil Hospital ryngkat bad i khun ki wan kai na ka thain Amlarem bad rung na ka surok Iongnoh ban mih sha Syntu Ksiar, Jowai pynban haba poi ha katei ka jaka kila liat ha kane ka surok bad hap shariat.

Ha kane ka jingjia u doktor Shylla ula khlad hashen, katba i khun i ba dang ar snem i lait im na kane ka jingjia.

La iohi nyngkong ia kane ka jingjia da ki khynnah ba ap masi hadien ba kila iohsngew iaka jingiam ine i khunlung bad kila pyrta jingiarap.

Ki pulit kila shimti met bad pyndep iaka jingdonkam ka aiñ bad ka jingtohkit kala iaid shakhmat halor kane ka jingjia.