Na ka phone u HNLC paw ki kam dawa pisa na kiba bun ki briew: Lyngwa

Syllad | The Rising MeghalayaMarch 6, 2024

Ka Deputy Inspector General of Police (TAP) ka Kong Claudia Lyngwa ha ka 5 tarik Lber, ka la ong ba lyngba ka phone ba la ioh kurup na u dkhot ka Seng kieng atiar Hynniewtrep National Liberation Council (HNLC), u Bah Storgy Lyngdoh la sakhi ia ki kam dawa pisa na kiba bun ngut ki briew.

Haba kren sha ki lad pathai khubor ka Lyngwa ka la ong ba u Storgy u la wan rungtuh sha Meghalaya napoh Bangladesh hadien ba u la shah kem noh ha ki bor pulit. Ka la ong ruh ba une u dkhot ka Seng u dei ruh uba don bynta ha ka jingiakren iasuk bad ka sorkar.

Ha kajuh ka por ka la ong ruh ba ka jingkhang na ka bynta ka jingiakren iasuk bad kane ka kynhun ka dang plie bad kan bteng ban plie.

Haba jubab ia ka jingkylli, ka DIG ka la ong, “Une u briew u la leit sha Bangladesh bad na kane hi la sngewthuh shai la u kwah ne em ban pyndem ia lade, barabor u don ha Shillong, bad ha ka jingsngew ka jong ngi ka don jingthmu aiu halor ka jingleit phai sha Bangladesh bad wanphai biang na Bangladesh, Nga ieh ha ka jingshemphang jong phi.”

Nalor kata ka la ong ba kim shym la don kino kino ki shithi dawa pisa uba la phah da une u dkhot sha kitei ki briew, hynrei ka dei lyngba ka phone jong u, ki don shibun ki contact number ba la sakhi kiba baroh ki dei kiba la dawa pisa na kiba bun ki briew.

Watla katta, ka Lyngwa ka la ong, “Ka jingiakren iasuk kan dang iai bteng bad lada don kiba leh ia ki kam kiba beain kumta ruh ngin hap ban shim ki jingpynshitom pyrshah ia ki.”

Ka DIG ka pyntip ruh ba katkum ki jingioh jingtip, ka jingkhlain jong ka seng HNLC ka long satang kumba 20 haduh 30 ngut ki briew. “Hynrei ngin ym lah ban ong ki jait tiar ialeh aiu kiba ki don sha katei ka jaka hynrei hangne ki don tang khyndiat eh,” ka la ong.

Ka la ong ruh, “Ka kam ka jong ngi ka long ban pynneh ia ka shongsuk shongsain bad kat ki jingtip kiba ngi ioh ngi shim ia ki sienjam khnang ban ioh ia ka jingshaniah na ki paidbah. Na ka por ba la sdang ia ka Seng HNLC ha Meghalaya, ki bor pulit ki la trei khlem shongthait. Ki la don bun ngut ki dkhot ka tnat pulit kiba la aiti la ka jingim ha kane ka jingialeh, bad kumba ka long mynta ka jinglong jingman ka la kylla ha ka jylla ha kaba ki nongwan shangkai na kylleng ki la wan tuid sha ka jylla, kata namar ki bor pulit ki la trei borbah.”

Ha kawei pat ka bynta kane ka heh pulit ka la maham ia kino kino kiba noh synniang sha ka HNLC namar ha kaba kut hi kane ka long pyrshah ia ka ain.

Shuh shuh ka Lyngwa ka la ong, “Ka jingkylli kaba iadei bad ka jingpyndem wait kam don satia namar ki la don lypa ha ka jingiakren iasuk bad kumta ngi la iakren bad ki bad ka jingkhang kan dang iai plie, ngim ju pynpaw ia ka jingbym don mon, ngi iai long barabor kiba kloi ban iakren.”