Na ka President ka India dawa ka NEHUSU bad KSU ban weng kam mardor ia u Vice Chancellor ka NEHU

Syllad | The Rising MeghalayaNovember 11, 2024

Ki samla pule ka North Eastern Hill University (NEHU) kiba pynlong jingiakhih ha ka 11 tarik u Naiwieng ki la dawa na ka President ka Ri India ban weng kam noh mardor ia u Vice Chancellor (VC) NEHU u Prof PS Shukla halor ka jingkynnoh ba um shym la lah ban pynbeit ia ki jingeh kiba dang iai bteng hapoh kane ka skulbah.

Ia kane ka shithi mudui la phah ryngkat lang da ka North Eastern Hill University Students’ Union (NEHUSU) bad ka Khasi Students’ Union (KSU – NEHU Unit), kiba la lamkhmat ha ka jingiakhih shah thngan kaba la iaid mynta lah 7 sngi kynthih.

Ka shithi ka la ong ba u VC u la shu jah klep na ka kam wat hapdeng ka jingshah thngan jong ki samla pule hapoh ka University.

“Ka la iasid mynta hynniew sngi naduh ba sdang ka jingshah thngan, hynrei wat hapdeng katne sngi ba ka la iaid ka jingiakhih jong ki samla hynrei u VC um shym la lah ban pyndep ia la ka jong ka kamram.Ka jingjah rngai jong u VC hapdeng ka kam khlem ka jingai jingtip ka dei kaba sngewkhia shibun bad ka pynpaw ia ka jingtlot ha ka jinglong nongialam ka jong u bad ka jingbym lah ka jong u ban leh ei ei halor kane ka jingeh kaba dang iai mynta,” ong kine ki ar seng da kaba bynrap, “Ha ka jaka ban shim bynta ban leh ei ei halor kane ka jingeh kaba iadei bad ka jingshah thngan jong ki samla pule hynrei u VC um shym la leh ei ei bad u la jah syndon napoh ka campus, kaba pyni ia ka jingbym lah ka jong u ban tehlakam ia ka jinglong jingman.”

“Halor kine ki mat kiba khia shibun, ki samla pule ki sngew ba u VC um dei shuh uba bit ban ialam ia ka University. Ka jingbym larkam ka jong u bad ka jingbym khein kor ia ka bha ka miat jong ki samla pule ka la ktah jur ia ka burom jong ka skulbah. Kumta ka seng ki samla pule ki kyntu ba dei ban weng kam noh mardor ia u VC na ka kam kaba u bat,” ki la dawa. 

“Ngi kyrpad jur ia ka ophis ka jong phi ban shim mardor ia ki sienjam ban pynbeit ia kine ki jingeh bad ban pynthikna ba ki jingtreikam jong ka University kin iaid beit iaid ryntih na ka bynta ka bha ka miat bad ka jingmyntoi jong ki samla pule jong ka,” bynrap ka shithi.

Nalor kata kine ki Seng samla pule ki la pyntip ruh ba kane ka jingshah thngan ka jong ki ka la sdang ktah bha ia ka koit ka khiah jong ki samla pule kiba pynlong jingiakhih.

“Kiba bun na ki, ki la poi hospital namar ka jingkem tlot nalor ka jinghiar jong ka Blood Pressure bad ka shini.Ka jingbym don jong u VC bad ka jingbym ai jingtip lano un wanphai ka la buh ia ka jinglong jingman jong ki samla ba iakhih hapdeng ka jingma,” k ial ong.

Ha kajuh ka por na ka liang ka Vice President ka KSU-NEHU Unit ka Cecelia Pyngrope ka la shah pynkit noh shapoh hospital hadien ka jingkem tlot kaba kynsan na ka jingshah thngan kaba la jam mynta sha ka sngi kaba hynniew.

Haduh mynta ki la don baroh haduh 9 ngut ki samla pule kiba la poi hospital ha kaba ia sawngut na ki la pyllait noh bad kiba la wan ban pyniasoh biang sha ka jingiakhih.

Ha ka 10 tarik u Naiwieng ki bor pyniasid ka NEHU ki la mudui da ka ejahar halor ka jingjia shah kawang maw ka iingsah bad ka kali jong u VC ka NEHU kaba la jia ha ka miet jong ka 9 tarik Naiwieng.Na ka liang ki bor pulit ruh ki la pynkhlain ia ka jingpahara hapoh ka campud jong kane ka skulbah.