Na ka Sorkar Pdeng dawa ka KAS ban wanrah da ka Bill ha ka dorbar Parliament ka ban wan ban ithuh ia ka Ktien Khasi

Syllad | The Rising MeghalayaOctober 5, 2023

Ka Khasi Authors’ Society (KAS) kala shim ia ki saw tylli ki rai kiba kynthup halor ka jingdawa na ka Sorkar Pdeng ba kan wanrah noh da ka Official Bill khnang ban lah ban pynrung noh ia ka ktien Khasi ha ka khyrnit ba phra jong ka Riti Synshar Ri hapoh ka Dorbar ka ban wan jong ka  Parliament.

Kane ka jingshim rai ka la wan long ruh hadien ka jingseisoh ha ka jingpynlong ia ka National Seminar halor ka ‘Ktien Khasi, ka thoh ka tar bad ka kolshor’ ha Delhi lem bad ka jingiakhih ba jai jai ba la pynlong ha Jantar Mantar ha ka 29 bad 30 tarik Nailur ba la dep.

Haba kren sha ki lad pathai khubor haka sngi Palei, u President ka KAS u Dr DRL Nonglait ula ong “Ngi la rai ban kyrpad ia ka Sorkar India lyngba ka Ministry of Home Affairs ban shim ia ka sienjam na ka bynta ban wanrah da ka Official Bill ha ka dorbar ka ban wan jong ka Parliament namar kane kan dei ka sienjam ka ba lah ban pynrung ia ka ktien Khasi ha ka khyrnit kaba phra jong ka Riti Synshar Khadar jong  ka Ri India. Na ka liang ka Sorkar kan hap ban pynkylla ia ka khyrnit ba phra ban pynrung ia kino kino ki ktien ba kin long noh shibynta jong ki ktien ha ka khyrnit ba phra.

Nalor kata u la ong ruh ba ka KAS kala shim ruh ia ka rai na ka bynta ban pan ia ka jubab na ka ophis u Myntri ka Tnat kam Pohiing ka Sorkar India ban tip ha kaba iadei bad ka jingiaid shakhmat jong ka  dorkhas jingdawa ban pynrung ia ka ktien Khasi ha ka khyrnit ba phra ka riti synshar khadar jong ka Ri.

Shuh shuh u la pyntip ruh ba ka KAS kala iakynruh ruh ia u Myntri kam pohiing barim jong ka ri u Rajnath Singh ha u bnai Kyllalyngkot 2019 kumjuh ruh ia u Myntri kam pohiing ba mynta ha ka 24 tarik Naitung, 2021 ha ka nongbah Shillong.

U Dr Nonglait u la ong; “Ngi dang ioh ia ka jubab na ka MHA tang ha u Lber 2019 bad hadien kane ngim shym la ioh jingtip ei ei shuh, ym don satia ka jingaiktien na ka Ministry sha ka KAS lane wat sha ka Sorkar Jylla. Dei na kane ka daw ngi la shim ia ka rai ban pan ia ka jubab na ka Sorkar India.”

U President u la pyntip ruh ba ka KAS ka la phah ruh ia ka documentation kaba iadei bad ka ktien Khasi bad kiba bun ki jingtip kiba shong nongrim sha ka President ka ri India kumjuh sha u Myntri Rangbahduh bad u Myntri kam Pohiing na ka bynta ka jingtuklar lem ha kaba iadei bad kane ka bynta.

Kumba ka long mynta u la ongruh ba ka KAS kan dang ap ia ka dorbar ka ban wan jong ka Parliament hashuwa ban shim ia kino kino ka rai kiba iadei bad ki sienjam kiba bud.