Na ka tnad DCA dawa ka VPP ban pynkut noh jingeh duh tulop ki nongtrei ka JHADC

Syllad | The Rising MeghalayaNovember 17, 2024

Ka Voice of the People Party (VPP), West Jaintia Hills District kala dawa na District Council Affairs ka Sorkar Jylla ban pynkut noh iaka jingeh duh tulop ki nongtrei jong ka Jaintia Hills Autonomous District Council (JHADC).

Ka VPP kala dawa na ka tnad DCA ban ai iaka jubab da ka jingthoh halor saw tylli ki mat kiba kala buh ha kaba iadei bad ka tulop jong ki nongtrei ka konsil. Ka VPP kala phah iaka jingthoh sha ka tnad DCA lyngba ka ophis u DC, West Jaintia Hills District.

Kine ki mat ki kynthup: Balei ka sorkar kam shym la pynkhuid ia ka tulop jong ki nongtrei watla ka council ka ioh iaka bhah khajna; hato ka sorkar ka don ka mon ban pynbeit ia kane ka jingeh shisyndon; lano ngi lah ban khmih lynti ba yn pyllait ia ka tulop kaba dang sahteng, bad lada ym lah pyllait, kiei ki daw; bad ka VPP kala dawa ban siew lut ia ka tulop kiba dang sah bad kan nym lah ban pdiang iaka jingpyllait tulop kaba khyndiat ne shibynta.

Haba pynpaw iaka jingsngew, ka VPP ka ong ba ka dei ka jingtlot bad ka jingbymskhem ka Executive Committee ka konsil, kumta kala kyntu iaka sorkar ban pyrkhat ban wanrah iaka jingsynshar Administrative Rule katkum ba shah ka ain ban weng iaka jingeh ki nongtrei ka konsil.

Ka VPP kala pynkynmaw ruh ba ha u bnai Nailur kala pynlong iaka jingshong kyllain mungor khmat ka khyrdop ka JHADC bad dawa iaka jingtuklar ka JHADC arsien arwat ban pyllait iaka tulop ki nongtrei ha u bnai Jylliew bad Naitung bala dep.