Na ki kjat sngi sha ka spah: Sdang iaka CM Solar Mission ha Jylla

Syllad | The Rising MeghalayaAugust 11, 2023

U Myntri Rangbah ka Jylla u Conrad K Sangma haka sngi Thohdieng u la plie paidbah ban sdang iaka ‘Chief Minister’s Solar Mission’ kaba thmu ban kyntiew ia ka jingpynmih bording ha ka jylla da kaba pyndonkam iaki kjat sngi (rays) bad ban pynkylla iaka sha ka spah da kaba pynduna iaka jingshaniah haka electricity ne ka bording. Ka sorkar kan pynlut haduh 100 klur ha ka shi snem ban pyniaid shakhmat ia kane ka mission.

Ia kane u Myntri u la pynbna ha ka jingialang ba la pynlong hapoh State Convention Centre, Shillong, ha ka jingiadon lang u Myntri ka tnat Bording Abu Taher Mondal, u Chairman ka MNREDA Rupert Momin bad kiwei.

U Myntri u la ong ruh ka jingiaroh ia ka Meghalaya New And Renewable Energy Development Agency kaba la trei borbah ban pynurlong ia kane ka projek ka ban ai shibun ki jingmyntoi ia ki paidbah ka jylla.

Na ka liang u CM u la ong ruh ba ka jingtuklar lyngba kane ka lad pynmih bording (Renewable Energy) ka ban lait na ka jingpynjot ia ka mei mariang. Da ka jingkut jingmut ban kyntiew ia ka jingpynioh bording lyngba kane ka rukom na ka liang ka sorkar kan pynioh ia ka subsidy kaba long 70% na ka bynta na ka bynta ki longiing shimet bad 50% na ka bynta ki skul, hospital, hotel bad kiwei pat ki jaka treikam.

U la ong ruh ba kane ka jingphaikhmat ha ka jingpynioh bording lyngba ka sngi ki nongioh jingmyntoi kin hap ban siew tang 10% na ka dor jong ki tiar ki tar ha ka por ba ki ioh pdiang ia kane ka skim.

Watla yn ym lah ban rat dyngkhong pura ha kaba iadei bad ki jingeh ha ka kam bording hynrei lyngba kane ka Solar Mission ka ban pyniaid shakhmat kan iarap na ka bynta ban pynioh haduh  30-40 % ka bording sha ki longiing lyngba kine ki solar unit bad ka ban long ruh ka jingmyntoi kaba khraw na ka bynta jong ki ha ka por ba don ka load shedding.

Nalor kata u la ong ruh ba ki jaka pule puthi bad kiwei pat ki tnat treikam kiba kham heh kin ioh jingmyntoi shibun lyngba kane ka skhim.

Shuh shuh u CM u la pynpaw ruh ba kala don ruh ka jingiakren bad ki kompeni shna battery ban lah pynkha ia ka karkhana pynmih battery bad ba maramot ia ki battery ha kane ka jylla bad ka jingthmu hi ka long ban tehlakam ia ki jingeh haba iadei bad ka jingdonkam ba bujli ia ki battery bad kiwei pat ki bynta bad ka ban plielad ruh ha kaba iadei bad ka ioh kam ioh jam na ka bynta ki samla.