Na Meghalaya sha Japan: 27 ngut ki nurse ban leit trei sha ki hospital ha Japan
Ka Overseas Nursing Job Fair ba la pynlong ha u snem ba la dep ka la kylla long u mawjam bad ka kabu na ka bynta ki 27 ngut ki Nos na kane ka jylla Meghalaya ki ban pynkhreh na ka bynta ban leit aijingshakri sha Japan hadien ba ki la pyndep ia ka jinghikai pyntbit ia ka ktien Japanese.
Lyngba kane ka sap kaba thymmai kine ki nos kin sa leit ban trei ban ktah ha ki hospital bad kiwei kiwei pat ki jaka sumar ha Japan.
![](https://www.syllad.com/wp-content/uploads/2024/09/JIT-Vacancy-823x1024.avif)
Shibynta jong ka “Skills Meghalaya” scheme, na ka liang ka sorkar Meghalaya ka la bei tyngka haduh T.50,000 ia iwei pa iwei na ki kyrtong lyngba ka Meghalaya State Skill Development Society (MSSDS), bad kane ka jingkyrshan ka thmu na ka bynta kumba 300 ngut ki nos ha kine ki snem ki ban dang wan.
Na ka liang u Myntri Rangbah ka Jylla u Conrad K Sangma uba la iakynduh ia ki nonghikai bad ki samla pule kiba ia don bynta ha kane ka kam pyntbit, u la pynpaw ka jingsngew sarong da kaba ong, “Ka long kaba sngewkmen shibun ban iohi ba ki Nos na kane ka Jylla kin ioh ia ka lad ban leit ban aijingshakri sha kiwei par ki ri ka pyrthei. Ngi la phah ia ki ha ryngkat ka jingkyrkhu kyrdoh bad kyrmen ruh ba iohsngew ia ki khana kiba sngewtynnad shaphang jong ki. Nga kyrpad ruh ia kiwei pat ki samla ba kin wan shakhmat bad ban shim ia kane ka kabu ym tang ban ioh kamai kamai na shabar jong ka ri hynrei ruh ban pyniar ia ki jingnang tip ha ki jingtrei jingktah.”
Ka “Skills Meghalaya” kaba shim ia kine ki lad aijinghikai ka dei kaba thmu ban pynkupbor ia ki samla lyngba ki sap ki phong kiba donkam.Ka prokram ba la pynlong da ka MSSDS abd ka Department of Health & Family Welfare ha ka jingiatreilang bad ki kompeni bapher bapher ka la pynioh ia ki jinghikai ban nang ban kren ia ka ktien ka thylliej jong kiwei pat ki ri nalor ka lad ha ka liang ka ioh kam ioh jam shabar jong ka ri.
Baroh ki la don ahduh 27 ngut ki Nos kiba la rejister bad ka NAVIS na ka bynta ban ioh jinghikai ban nang ia ka ktien ka thylliej bad ka kolshor ha Bengaluru. Haduh 25 ngut na ki ki la pass ia ka N4 bad N5 eksam ka sien pyrshang kaba nyngkong bad ioh pdiang ia ka jingtyrwa ha ka kam ka jam. San ngut ki Nos ki la dep ioh ia ki Visa bad arngut ki la leit sha Japan ha ka 27 tarik u Jymmang ba la dep katba kiwei pat ki dang ap ia ki visa.
Haduh 14 ngut ki Nos ki la dep ban ioh kam ha ki jaka sumar bapher bapher ha Singapore kumjuh lyngba kiwei pat ki agency. Kine kin sa leit ban pyniasoh sha ki kam ki jam jong ki hapoh ka lai bnai.
Ia ka jingai jinghikai la pynlong da ki 10 ngut ki nonghikai kiba dei na Japan hapoh NAVIS, kaba pynpaw ruh halor ka jingseisoh jong kane ka prokram. Wat hapdeng ki jingeh halor ban nang ia ka ktien kaba thymmai, kine ki samla pule ki la trei shitom kum ka lad ban pynioh jingmyntoi.
Kane ka sienjam ka la wan long ruh hadien ba ka sorkar Jylla ka la iasoi ia ka MoU bad kine ki kompeni ha ka 7 tarik u Nohprah 2023, na ka bynta ban aijinghikai ha ka liang ka ktien bad ka jingplielad ha ka jingpynrung kam ia ki samla ka jylla sha kylleng ki ri ka pyrthei kaba kynthup kum sha Japan, UK, Singapore bad UAE.
Leave a Reply