Na Nagaland kem ki pulit ia 4 ngut ki runar ba lute ia ka petrol pump ha Ri Bhoi

Syllad | The Rising MeghalayaSeptember 2, 2024

Ki pulit ka Ri Bhoi District ha ka 1 tarik mynta u bnai ki la ioh ban kem noh ia ki sawngut ki runar kiba donkti ha kaba lute ia kawei ka Petrol Pump ha Umran Niangbyrnai, Ri Bhoi District na ka Jylla Nagaland.

Kine ki runar kiba la shah kem noh napoh Dimapur, Nagaland ki dei kiba la tip kyrteng kum u Bokavi Zhimomi (25) na Vetenary Colony, Burma Camp, Dimapur; u Pashen Lam (32) na Burma Camp, Dimapur, Rokonggulie Keppu (18 snem) na Rail Bazaar, Dimapur bad uwei u bym pat shym la tip kyrteng.

U Superintendent of Police ka Ri Bhoi u Jagpal Singh Dhanao u la ong ba kane ka jingjia shah lute jong katei ka Petrol Pump Umran Fuels ka la jia ha ka 25 tarik u Nailar ba dep ha kaba ki runar ki la ioh ban khung ia ka pisa kabakot haduh palat T. 4,24,614 /- kynthup ia ki laitylli ki mobile phone. Ha kane ka jingjia ki runar ki la thombor ruh ia u Manager jong ka Petrol Pump.

Uwei pat uba la shah kynnoh donkti ia uba ym pat shym la tip kyrteng u dang don mynta ha kti jong ki pulit ha Tuensang District Police, Nagaland bad na ka liang ki pulit ka Ri- Bhoi ki dang don ha ka lynti ban leit shimti ia u bad wanlam hakhmat ka iingkashari.

Ha ka jingtohkit kine ki runar kila phla ia ka jingdonkti ha katei ka kam lute bad hadien la ialam noh ia ki shapoh ka iingkashari ka District ban tian bishar bad la ai por 5 sngi ba kin don ha ki kti jong ki pulit na ka bynta ban pynlong shuh shuh ia ka jingtohkit.

Ki Pulit kila ioh ruh ban kurup noh ia kawei ka kali Bolero kaba don ia u No- NL07-CB-1056 ia kaba la  pyndonkam da kane ka kynhun runar ha katei ka jingleit lute ia katei ka Petrol Pump.