Na suin pynher lama masi u Jagadguru, byrthen ban kiew iinglieh iingsaw ba khang hiar ha Shillong Airport

Syllad | The Rising MeghalayaSeptember 29, 2024

Ka seng shit niam Hindu ba la ialam da u Jagadguru Shankaracharya Swami Avimukteshwaranand Saraswati ka la byrthen ban ujor pyrshah ia ki bor pyniaid liengsuin sha ka iingbishar Supreme Court namar ka jingkhanglad iaki ban wan da ka liengsuin bala wai na Agartala ha Shillong Airport haka 28 tarik Nailur.

Kane ka la wan long hadien ba ka sorkar Jylla ka la kyrpad ia ki bor pyniaid liengsuin ban khanglad ia ka liengsuin kaba kit ia kine ki nongialam shit niam Hindu ba kin ioh hiar hapoh ka kad liengsuin Shillong Airport ha Umroi da kaba kdew halor ka jinglah ban mih ka huri hura bad pynthut ia ka shongsuk shongsain ha ka jylla.

Kane ka jingkyntait ai jingbit ka la pynlong ia kane ka kynhun seng Hindu ba la lamkhmat da u Avimukteshwaranand Saraswati uba paw bha kum u Jagadguru ba kan hap ban pynsangeh noh ia ka jingthmu ban wan sha kane ka jylla na ka bynta ban pynlong ia ka rally khang shoh doh bad bam doh masi ha ka nongbah Shillong ia kaba la pynbeit ban pynlong ha ka 2 tarik u Risaw.

Ban pyrshah jur ia kane ka jingwan jong u Jagadguru, na ka liang ki kynhun Sengbhalang bapher bapher ki la ialum lang shabar ka Shillong Airport ban pynpaw pyrshah halor kano kano ka jingthmu wan iuhkjat jong kane ka kynhun.

U nongaiktien kane ka kynhun u Raja Saksham Singh Yogi u la ong, “Ngin leitphai biang sha Guwahati (naAgartala) hynrei ngin sa leit ban ujor pyrshah ia ki bor pyniaid liengsuin ka Shillong bad Agartala.”

“Ngin leitphai noh sha Guwahati namar ngim kwah ban pynmih ia kano kano ka huri hura bad ban pynthut ia ka shongsuk shongsain. Hynrei shen ngin ujor pyrshah sha ka Supreme Court,” u la ong.

Haba kylli, u Yogi u la ong,”Ngi la wan da ka jingsuk tang na ka bynta ban iasam lem ia ka jingsngew ka jong ngi hynrei ym ban pynthut iano iano ruh.”

Une nongialam niam Hindu, u Avimukteshwaranand Saraswati, uba dei u Shankaracharya jong ka Jyotir Math Peeth ha Uttarakhand, hadien ba um ioh hiar ha Shillong, ula pynher iaka lama masi napoh liengsuin hajrong ki lyoh ka jylla Meghalaya.

Lah ban kdew ba ka sorkar Meghalaya ha ka 27 tarik Nailur ka la thoh sha ki bor pyniaid ka Airport Authority of India (AAI) ba kan khanglad ia ka jingwan hiar ka liengsuin kaba kit ia une u nongialam seng Hindu bad ka kynhun jong u hapoh Shillong Airport, Umroi ha ka sngi kaba bud.

Kumjuh na ka liang ki bor pyniaid district jong ka East Khasi Hills bad Ri Bhoi ruh ki la pynjari da ka kynhun Section 163 jong ka BNSS kaba khang pyrshah ban pynlong ia kiba kum kine ki rally ialap khang shoh doh bad bam doh masi.

Ha kajuh ka por na ka liang ka Central Puja Committee (CPC) ruh ka la pynpaw shai ba kim kyrshan satia ia kane ka kynhun iada masi bad ia ka jingthmu pynlong rally ka jong ki ban pynbna ia ka masi kum ka kmie jong ka ri ha ka 2 tarik u Risaw ha ka nongbah Shillong.