Na u Conrad leit dawa surok Four Lane, College Sorkar ka Synjuk Waheh Shnong East Jaintia Hills, pan jingshai ruh halor ka lynti rel

Syllad | The Rising MeghalayaAugust 4, 2023

Ka Synjuk Waheh Shnong East Jaintia Hills District haka 2 tarik mynta u bnai Nailar ka la iakynduh ia u Myntri rangbah ka Jylla u Conrad K Sangma bad aiti ruh iaka dorkhat halor mat jingdawa na bynta ban pynbiang iaka roi ka par jong ka thain East Jaintia Hills.

Katkum ka dorkhat ka Synjuk Waheh Shnong East Jaintia Hills District, ka la dawa ban pynbha pynmiat iaka surok bah National Highway-6 (NH-6) kaba la jot rathai bad buh jingeh shi katdei eh iaki nongleit nongwan lyngba kane ka surok.

Ka Synjuk Waheh Shnong East Jaintia Hills District, ka la pynpaw ruh ka jingsngewkhia halor ka jingtwa khyndew man ka por ha Sonapur Tunnel bad wanrah ka jingsahkut ki kali da ki bun bun kynta na kadaw ka jingtwa khyndew ha Sonapur Tunnel bad ha kaba iadei bad kane ka synjuk ka la dawa na u Myntri Rangbah ba un shimkhia ban iakren bad ki bor ba halor jong ka NHAI ban shna iaka Tunnel ha ki bynta ba twa khyndew khnang shngain ki nongleit nongwan.

Shuh shuh haka jingiakynduh bad u Myntri rangbah, ka synjuk ka la dawa ban pynheh iaka surok NH6 sha ka Four Lane khnang ban pynsuk iaka leit ka wan bad pyllait na ka jingsahkut kali, namar kane ka surok kadei u budlum jong ka Jylla Meghalaya bad pyniasoh ruh ia kiwei ki Jylla.

Ka synjuk ka la dawa ruh ban pynshna iaka surok Sutnga-Saipung ba don 46 km bad ba jinglong jingman jong kane ka surok ka long kaba la sinew sha ba palat bad buh jingeh iaki paidbah khamtam haka pang bad shitom.

Ka Synjuk ka la dawa ruh ban buh iaka Government Secondary School, Higher Secondary School bad ka College sorkar hapoh ka District namar kumba long mynta ym pat don kawei ruh ka jaka pule hapoh ka District bad kane kala buh jingeh kaba khraw iaki kmie ki kpa ban phah skul iaki khun ki kti Shabar ka District namar naduh ba khang iaka jingtih dewiong bun ki khynnah ki hap ban pep skul noh shiteng por namar ki kmie ki kpa kim lah kyrshan iaki khun ban bteng iaki jingpule.

Ka Synjuk ka la dawa ruh ban buh iaka Land Custom Station hapoh ka District khamtam ha ki bynta ka shnong Kuliang lane ha kiwei ki bynta jong ka East Jaintia Hills ban pynsuk iaka khaii ka pateng hapdeng ki ar Ri (India-Bangladesh) lyngba ka Jylla Meghalaya bad ban long ruh ka lad kamai kajih iakai paidbah namar ka District ka don shibun ki marpoh khyndew kynthup u mawshun, dewiong, ki mar rep bad kiwei kiwei.

Ha kaba iadei bad ka lynti Rel, ka synjuk la ka pan ka jingpynshai na u Myntri rangbah bad na ka liang u Myntri rangbah ula ong ba un phah da ka jingthoh halor kane ka mat, la pynkut ka kyrwoh ba la phah da u Ma Hambertus Nongtdu, President SWSEJHD bad u Ma Jesper Bareh, General Secretary SWSEJHD.