Na u DC bad ki heh Topcem dawa pynher krad ka JSU ia ki arngut ki bar jylla 

Syllad | The Rising MeghalayaAugust 28, 2023

Ka Jaintia Students’ Union (JSU), haka sngi Nyngkong ka la leit ban iakynduh ia u Deputy Commissioner, East Jaintia Hills District kumjuh ia ki heh ka kompeni Topcem ban dawa ban pynher krad noh mardor ia ki arngut ki bar jylla kiba trei hapoh kane ka kompeni na kane ka jylla namar ka jingdonkti ha kaba pynshit ia ki pulit ban bom ban tied naphang ia ki paidbah ha ka por ba pynlong ka jingiakhih pyrshah ia ka jingpynlong public hearing ha Thangskai, East Jaintia Hills ha ka 24 tarik mynta u bnai.

Kane ka jingleit dawa jong ka JSU ban pynher krad noh ia kine ki arngut ki nongtrei napoh kane ka jylla ka long ban lait na kino kino ki jingjia ba sngewsih, bad ka seng ka la maham ruh ia ki heh ka Topcem ba lada ki dang pynneh ia kine ki arngut ki bar jylla hapoh kane ka kam kin sa mih ki jingsngewsih bad wat ka jingsngew iapher jaidbynriew.

Nalor kata ka JSU lyngba une u kyrwoh ka la ong ruh ba lada jia kiba kum kine ki jingjia na ka liang kane ka kompeni ka hap ban shim ia ka jingkitkhlieh bad ka dei ruh ban pynsngap ia kane ka jingdawa jong ka seng ban pynher krad noh ia kine ki arngut ki nongtrei na kane ka jylla Meghalaya.

Ha kaba iadei bad kane ka jingdawa jong ka JSU, na ka liang ki heh jong katei ka kompeni ka la mynjur bad pynpaw ba ki la phah sha ki bor ba halor jong ka kompeni ban leh ia kaba donkam. Na ka liang ka JSU ka la ong ruh ba kane ka kompeni kan hap ban pynthikna halor kane ka jingdawa jong ka seng lem kumta kan ngat ha ka jingeh.

Kumjuh ruh ha ka jingiakynduh ia u DC ka EJHD, na ka liang jong u ruh u la kular ban thoh sha ka tnat Home bad Political Department na ka bynta ban beh noh syndon ia kine ki arngut ki nongtrei jong katei ka kompeni na kane ka jylla.