Na u DC EJH dawa pyndam iaka PRC u samla ioh pule MBBS, kynnoh ka shnong Thangskai ba pyndonkam bakla iaka syrnot shipor

Syllad | The Rising MeghalayaSeptember 6, 2023

Wat hadien ba ka Myntri ka tnad ka koit ka khiah kong Ampareen Lyngdoh kala ong ba kin sa shim iaka rai halor ki jingujor kiba mih pyrshah ia ki katto katne ki samla pule kiba la shah jied ban ioh leit pule MBBS naka bhah ka Jylla ne state quota tad haduh wan phai u Myntri Rangbah ka Jylla Conrad K Sangma uba don mynta shabar ka jylla.

Hynrei na kaliang ka Jaintia Students’ Union bad ka dorbar shnong Thangskai kila ujor sha u deputy Commissioner, East Jaintia Hills ban pyndam iaka Permanent Residential Certificate (PRC)  jong uwei u na ki 10 ngut ki samla pule MBBS naka open category haka sngi Balang.

Shuwa kane ka JSU bad ka dorbar shnong Thangskai kala ai da ka jingthoh sha ka Kong Amapreen Lyngdoh ban dawa pyndam iaka kyrteng uwei na ki bar jylla uba la kynnoh ba pyndonkam bakla iaka syrnot shnong ban ioh pule MBBS na ka state quota.

Une u samla pule uba ioh ban pule MBBS da ka state quota u dei Ayush Kumar bad ki kmie ki kpa jong u ki dei kiba trei hapoh karkhana dewbilat bad ka shnong ka lah ai syrnot nong shong shnong tang hynriew bnai.

Shuh shuh hadien baka Myntri ka tnad ka koit ka khiah, ka Kong Ampareen Lyngdoh kala ong ba kim don bor ban pyndam namar ia kine ki syrnot PRC la ai beit da ki DC jong ki district.

Kumta ban pynbor iaka sorkar ban pyndam ia kane ka PRC ki samla kiba shah jied ban pule MBBS naka open category, ka JSU Khliehriat Circle haka jingiadonlang u Waheh Chnong Thangskai u ma Phai Syrti bad ki dkhot committee shnong jong ka shnong Thangskai kila iakynduh ia u DC East Jaintia Hills.

Na kaliang ka shnong ka lah ai syndon daka jingthoh sha u DC ban pynduh pyndam iaka Permanent Residential Certificate (PRC) u samla naka open category u Ayush Kumar bad kynnoh ba ki pyndon kam bakla bad leh thok ban apply iaka state quota ban pule MBBS.

Ka shnong ka la pynshai ba ha u snem 2021 lah ai syrnot nong shong shnong kaba shipor ba hynriew bnai namar u kpa jong u ne u samla u Sunil Kumar u dei u ba trei ha Dalmia Cement u la pan ia ka Temporary Residential Certificate na ka shnong ban phah sha ka skul sha Orissa, hynrei pynban ki ne ki bar jylla ki lah pyndonkam thok ban apply iaka PRC na DC office ha East Jaintia bad ki lah leh thok bad shukor ban ioh lad syndon ban ioh state quota na ka sorkar ban pule MBBS.

Kumta na ka liang ka shnong ka lah ai da ka jingthoh sha u DC ban dawa pynduh pyndam syndon iaka PRC bad ia seat quota MBBS namar u ne u khynnah bad u kpa jong u ki lah leh thok bad shukor ban myntoi ialade.

Na ka liang ka seng JSU ka lah maham iakiwei ruh ki bar jylla bad iaki nongialam shnong ba ym dei ban shim kabu lane ban ai NOC lane kino kino ki syrnot sha ki bar jylla bad ka seng ka dawa syndon na ka myntri ka sorkar jylla ban pyndam iaka bhah u Ayush Kumar na ka thup pule doktor MBBS bad dei ban ai sha ki trai ri trai muluk.