Na u Myntri dawa ka HYC ia ka bhah thungkam ba  44% ia ki riewlum ka Jylla ha ki ophis Sorkar Pdeng

Syllad | The Rising MeghalayaNovember 30, 2023

Ka Hynniewtrep Youth Council (HYC) haka 29 atrik Naiwieng, ka la kyrpad ia ka jingtuklar lem jong u Myntri ka Tnat Social Welfare u Bah Paul Lyngdoh ban pynthikna ba baroh ki ophis ka sorkar pdeng kin pyntreikam ia ka bhah kyrpang kaba 44% na ka bynta ki paid riewlum ne ki Scheduled Tribe ha ka jylla.

Nalor kata ka HYC ka la daw ruh ban thaw noh mardor ia ki Fast Track Court na ka bynta ban pynkloi ban pynkut ia ki case halor ki kam drok bad ban pyntreikam ruh ia ka Prevention of Illicit Traffic in Narcotic Drugs and Psychotropic Substances Act, 1988 (PIT-NDPS Act).

Ha ka shithi ba la ai sha u Myntri, u president ka HYC u Bah Roy Kupar Synrem u la ong, “Namar kata ngi kyntu ia ka sorkar Meghalaya ba kan shim ia ki sienjam kiba dei ban pynthikna ba baroh ki ophis ka sorkar pdeng/jaka pule bad kiwei pat ki jingtreikam ka sorkar pdeng kiba don ha ka jylla ba kin bud bad pyntreikam ia ki Office Memorandum  bad kiwei pat ki jingbthah ba la pynmih da ki Tnat treikam ka sorkar India khnang ba ki trai shnong riewlum ka jylla kin ioh ia ka jingmyntoi lyngba kane.”

U la ong ba katkum ka  Office Memorandum No.360 1711 12004-Estt.(Res.) ba la pyllait da ka Sorkar India, Ministry of Personnel, Public Grievances and Pensions, Department of Personnel and Training New Delhi, dated the 5th July, 2005; Office Memorandum dated 4th July, 2007 bad  COMPENDIUM OF INSTRUCTIONS No. F.No.36011/1/2022-Estt.(Res-I) dated 14.10.2022, ka sorkar India ka la pynthymmai ne revise ha kaba iadei bad ka jingbhah kyrpang na ka bynta ki Scheduled Castes, Scheduled Tribes bad kiwei pat ki Backward Class ha kaba iadei bad ka jingpynrung kam beit beit ha ha ki post ‘C’ bad ‘D’ bad kiba khring ruh ia ki nongapli kam na ki shnong ki thaw bad napoh ka thain.

Katkum kine ki Office Memorandum kiba don ia ki jingbthah, ha Meghalaya ka jingbhah kyrpang ka long 1 % na ka bynta ki Scheduled Castes, 44% na ka bynta ki Scheduled Tribe bad 5 % na ka bynta kiwei pat ki Backward Class.

“Ngi la ioh shibun ki jingtip ba bun na ki ophis /jaka pule bad kiwei pat ki jingtreikam kiba don ha ka jylla Meghalaya kim shym la bud ia ka shithi ba la kdew ha ka Office Memorandum, bad kumta ruh ki samla riewlum ka jylla kim shym la iohlad satia ban rung kam hapoh kine ki jaka treikam ka sorkar pdeng,” ong u Bah Synrem da kaba bynrap ruh ba na ka liang u Myntri u la pynthikna ban rah ia kane ka mat bad ki bor ba dei khmih.

Nalor kane u Bah Synrem ula ong, ba kila kyntu ia ka sorkar ban shim ia ki sienjam ban pynthikna ba ka Fast Track Courts/Special Courts kumba la kdew hapoh ka DREAM Project, na ka bynta ban bishar ia ki jingjia hapoh ka NDPS Act ba dei ban dei ban thung noh mardor khamtam ha ka East Khasi Hills District.

“Kumba long mynta, ym don Special Court ban shong bishar ia ki jingjia hapoh ka NDPS Act, kumta ki jingtian bishar kila sahteng da ki snem khamtam ia ki sakhi ki satar bad ia ki riewpaidbah ban ai jingkyrshan ia ki bor ka sorkar jylla ha kaban iakhun pyrshah ia u drok” ula ong.

Ha kajuh ka por u la ai khublei ia ka tnat Social Welfare na ka bynta ban sdang ia ka Drug Reduction, Elimination, and Action Mission (DREAM) ha ka 27 tarik u Jylliew 2023 da ka jingthmu ban pynkylla ia ka jylla sha ka jylla kaba lait na u droks bad ka ong, ba kadei ka polisi treikam khlem kano kano ka jingartatien ban pynduhjait ia ki jingdih kiba sniew bad ban pynlong ia ka imlang sahlang ban lait na ka jingngop ha ka jingkyrni na ki jingdih ia kaba baroh ki khnih lynti. Hynrei kaei kaba sngewkhia bha ka long ba katei ka Mission/Policy kam dei ban long kum kiwei pat ki kot ki sla kaba itynnad tang ha ka kot hynrei kaba pulom ha kaban iaid shakhmat ne ban pyntreikam kumba la thrang.

“Ngi kwah ban kyntu ban shim ia ki lad ki lynti ban pynkhlain shuh shuh ban tehlakam ia ki nongkhaii droks, da kaba kem bad pynngat ia kiba donkti bad ki nongdie kiba la shah kem palat ia ka shisien hapoh ki kyndon jongka PIT-NDPS Act,” ula ong.Ula bynrap ba ka sorkar jylla kala thung ia ka Advisory Board kumba la kdew ha ka PIT-NDPS Act, 1988 bad haduh mynta katkum ka jingbthah ka jong ka, tang 9 ngut ki briew kiba la donkti ha ka kam khaii drok bad kila shah kem haduh 3 snem. Ngi kyntu ia ka tnad ban shimkhia bad ban leh da kaba tyngeh ia kitei ki nongpynkhein ain,” ong u Synrem.