Na u Sniawbhalang Dhar dawa kyntiew kyrdan Subdivision ka KSU iaka Laskeiñ C&RD Block

Syllad | The Rising MeghalayaSeptember 16, 2020

Ka Khasi Students’ Union (KSU) Laskein Circle haka sngi ba Ar haka jingialam u Justice Paul Lyngdoh Assistant Publicity Secretary ka KSU Laskeiñ Circle ka la leit ia kynduh ia u Ma Sñiawbhalang Dhar, Myntri ka Sorkar Jylla ha Circuit House Jowai naka bynta ban buh iaka jingdawa ban kyntiew kyrdan iaka Laskein C&RD Block sha ka Civil Sub Division.

Ka KSU haka jingthoh kaba la phah sha utei u Myntri Sorkar kala ong, ba ka Laskein C&RD Block kadei ka block kaba la rim tam bad ia kaba la buh maw nongrim ha u snem 1973 bad ka don haduh 96 tylli ki shnong kynthup ruh iaki shnong khappud bad ka Assam.

Ka Laskein kadon ka jingbun briew palat 92 hajar tam ki paidbah nongshong shnong bad ka kynthup ruh ia ar tylli ki thain, kata ka Mowkaiaw LA Constituency bad ka Raliang LA Constituency.

Ka KSU kala pynpaw ba ka Laskein CRD Block ka ladei por ban kyntiew kyrdan noh iaka sha ka Sub Division khnang ban pynjan iaki tnad sorkar bad ban pynsuk iaka rukom ai jingshakri bad ki paidbah ka thaiñ khamtam iaki shnong kiba don ha khappud.

Naka liang u Ma Sniawbhalang Dhar ula kular ban shimkhia iakatei ka kam bad hakajuh ka por u la kular ruh ba un sa pynpoi ia katei ka jingthoh jong ka Seng sha u Myntri Rangbah ka Jylla na ka bynta ban ioh bishar bniah iaka kam.