Na Uttarakhand yn leit shimti ka Meghalaya ia ka lama ka IOA ban pynlong ia ka 39th National Games 

Syllad | The Rising MeghalayaFebruary 12, 2025

U Myntri Rangbah ka Jylla u Conrad K Sangma ha ryngkat ka kynhun jong u ha ka 14 tarik Rymphang  kin sa leit shimti ia ka lama jong ka Indian Olympics Association (IOA) na Halwandi, Uttarakhand kum ka dak ka jingshimti ban pynkhreh na ka bynta ban pynlong ia ka 39th National Games ha Meghalaya.

Nalor u Myntri Rangbah kane ka kynhun kan kynthup ruh ia u Myntri ka Tnad Sports ka Jylla u Bah Shakliar Warjri, ki Ophisar Sorakr, ki dkhot ka Meghalaya State Olympic Association bad kiwei kiwei.

Ia kane ka lama ka IOA yn aiti da u Myntri kam pohiing jong ka ri u Amit Shah ha ka jingialang pynhap pyrda ia ka 38th National Games kaba dang bteng ha Halwandi, Uttarakhand, ha ka jingiadonlang ka President ka IOA ka PT Usha, u Myntri Rangbah ka Uttarakhand Pushkar Singh Dhamu bad Myntri kam ialehkai ka Ri Rekha Arya nalor kiwei pat.

Ka IOA kala phah ia ka shithi sha ka Jylla kaba pyntip ba ka Meghalaya ka la shah jied ban pynlong ia ka 39th National Games, ka ban long ha u bnai Rymphang-Lber 2027, kata kaba jia ryngkhat ruh bad ka jingrakhe ka Jylla ia ka lyngkhuh snem kaba 55 jong ka jingioh la ka jong ka Jylla.

Haba pynpaw halor kane ka jingpynbna ka IOA, u Myntri Rangbah ka Jylla u la ong, “Ka National Games ka dei ka dak jong ka jingiaid lynti ha ka ri ban pynpaw ia ki sap ki phong ha ki kam ialehkai sports. Ka dei ka burom kaba khraw ia ka Meghalaya ban ioh pynlong kat ia kane ka lympung kaba heh bad ka ban plielad ia ki samla ka jylla ba kin ioh ban iashim bynta ha ki rynsan iakop bapher bapher.”

Na ka liang u Myntri ka Tnad Sports u Bah Shakliar Warjri ruh u la pynpaw ia ka jingkmen kaba khraw bad ong, “Ka Meghalaya ka la sakhi halor ka jingkiew sted ha ki kam ialehkai sports naduh kine ki khyndiat snem ba ladep, bad ka la long kaba kloi ban shah kynthup kum kawei na ki jaka kiba khlain bha ha ki kam ialehkai sports hapoh ka ri. Ngi phaikhmat ban pdiang sngewbha ia ki nongialehkai bad ki nongkyrshan kumjuh ba kin wan sha Meghalaya bad ban sakhi ia baroh ki jingtyrwa kiba ka Jylla ka don ban ai.”

Ha ka jingshisha ia ka 39th National Games la dei ban pynlong ha u snem 2022, hynrei la pynjlan noh hadien ka jingwan lynshop jong ka khlad Covid ha kaba la pynkylla noh ruh ia ka jaka ban pynlong. Naduh katei ka por ka Jylla ka la bteng ban pyndonkam ia ka por ban tei ia ki jaka ialehkai bad kyntiew ia ka kam ialehkai sports ha ka Jylla nalor ka jingkyrshan ia ka jingnangkiew jong ki riew don sap.

Nalor kata kane ka jingpynbna ka la wan long ruh ha ka por ba ka Meghalaya ka la paw bha ha ka 39th National Games kaba la long ha Uttarakhand, ha kaba ki la don haduh san ngut kiba la ioh ban khur takma. Ka Meghalaya ka la dep iaid shakhmat ban pynkhreh ia kane ka lympung kaba heh ha ryngkat ka jingiatreilang bad ka MSOA bad kiwei kiwei ki kynhun ialehkai.

Ka Meghalaya ka la pynkhreh ban pynlong ia kane ka lympung ialehkai ha baroh ki laitylli ki thain jong ka Jylla, kata ha Shillong, Tura bad Jowai, ha kaba la khmih lynti ruh ba kin don haduh kumba khatar hajar ngut ki nongwan iashim bynta.