Naduh 29 tarik yn sangeh kit umphniang petrol bad gas ki tanker ba kynnoh shah pyndik ha ki Pulit Meghalaya

Syllad | The Rising MeghalayaNovember 28, 2023

Ka North East Petroleum Mazdoor Union (NEPMU) ne ka synjuk ki nongniah kali tanker haka 27 tarik Naiwieng kala rai ban ban sangeh kit umphniang petrol bad LPG cylinder na Indian Oil Corporation Limited (IOCL), Bharat Petroleum Corporation Limited (BPCL) bad Hindustan Petroleum Corporation Limited (HPCL) naduh ka 29 tarik Naiwieng tad haduh ba ki pulit jong ka Meghalaya ki sangeh shisyndon ban pyndik iaka leit ka wan jong ki kali tanker.

Ia kane la pyntip da u General Secretary North East Petroleum Mazdoor Union Ramen Das haka shithia kaba la phah sha u myntri ka tnad Meghalaya Food Civil Supply and Consumer Affairs.

Ka Union kala pyntip ba naduh ka 24 tarik Naiwieng, ki Pulit ka Jylla la kynnoh ba kila pynshitom iaki dkhot ka Oil Tanker Drivers bad ki nongiarap halor ka kynnoh ba leh kam beain ha ka thain Ri-Bhoi District kaba sdang na 18th Mile.

Ka Union kala kynnoh ba ki pulit kila bat iaki nongniah Tankers kiba ieng shabar ka Dhaba ban bam ban dih ha 22 Mile bad la register case pyrshah iaki.

Ha ka sngi kaba bud ki pulit kila kem ruh iaki katto katne ki Tanker khlem kino kino ki daw kaba la buh jingeh iaki nongniah trok tanker. La kynnoh ba haba ki nongniah tanker ki kyntait iaki jingkynnoh pyrshah iaki, ki pulit ki pynshitom iaki, shim jingtohkit bad shongdur.

Halor kane ka jinglong jingman namar ba jingtieng jingsmiej ki nongniah trok kit umphiang bad tyndong lyer shet jingshet kila rai ban sangeh ban rung sha Meghalaya.

Ka Union kala ong ba lada lap ia kino kino ki nongniah tanker ne nongiarap kiba leh iaki kam beain ki pulit ki lah ban kem iaki katkum ki kyndon jong ka ain bad ka union ruh kan ai ka jingiatreilang khlem kano kano ka jingmap, hynrei kiba lui lui kim dei ban shah pynshitom la ong u Ramen haka shithi.

Ka union kala kyntu jur iaka sorkar Meghalaya ban sangeh mardor ban pynshitom iaki nongniah tanker bad weng iaka case khlem da buh ia kino kino ki kyndon.

Ka Union kala kdew ruh ba iaki Dealers bad Transporters kim shym la ioh iaka Central Govt. Minimum Wages, PF, ESI bad kiwei kiwei ki jingmyntoi hadien ki jingkyrpad ba bunsien bad ki dawa ruh ban pyntreikam iaka aiñ ki nongbylla.