Naduh lashai ka sngi yn sdang lum ñiut ka JMB, la thaw ïaka committee pynkhuid Iawmusiang

Syllad | The Rising MeghalayaMarch 30, 2021

Naduh lashai ka sngi 30 tarik une u bnai ka Jowai Municipal Board (JMB) kan sdang biang ban pynlang ïaki ñiut kiba mih na Iawmusiang, Jowai hadien ba kala sangeh mynta la ar artaiew hadien ka jingpyrshah ka KSU Mupyut Unit, War Jaintia Circle bad ki shnong ba marjan ïaka jingbret ñiut pathar kat shaba lap ba shem.

Ïa kane la pynthikna hadien ka jingwan ïakynduh ki nongïalam ka Seinraij Jowai, CNI Market Committee bad ka Dorbar Shnong Tympang Iawmusiang ïa u Deputy Commissioner, West Jaintia Hills District u ma Garod LSN Dykes ha ka sngi ba Ar.

Ha kane ka jingïakyduh ia u Deputy Commissioner la ïadonlang ruh u PK Boro, CEO, Jowai Municipal Board.

U Ma Edystone Shylla ula ïathuh ba ka jingwan ïakynduh ïa u Deputy Commissioner ka district kalong kaba seisoh bad ka jubab kaba kila ïoh kalong ba ka JMB kan sdang ban lum ïaki ñiut kiba mih na sor Jowai naduh lashai ka sngi 30 tarik Lber.

Ula ong ruh ba hadien bala dep lum ïaki ñiut na Iawmusiang, ka JMB kan sa leit ban pyllang ïa ki ñiut na man la ki thliew ïing.

Na kaliang jong kine ki nongialam kila pynpaw ïaka jingsngewnguh ïa u Deputy Commissioner bad ka JMB halor ka jingshimkhia jong ki ban pynbeit kane ka kam. La kyntu ruh ïaka sorkar ban shimkhia ban lait na kine ki jingeh bad ban theh ki lad jingïarap ban shna pynbha ïaka jaka theh ñiut ban ïabit ïabiang lang baroh salonsar.

Shuh shuh u ma Edystone Shylla ula ong ba kila thaw da ka Coordination Committee for Clean Iawmusiang ne ka committee ban iakhun ban pynneh ïaka jingkhuid jingsuba ka Iawmusiang.

Ïa kane ka committee yn khlieh da u ma Edystone Shylla kum u Chairman, Vice Chairman Arwotki Sumer, Secretary bad Assistant Secretary u Ambrose Gatphoh bad u Latu Nartiang.