Naduh u bnai Jylliew dei ban sdang noh ïa baroh ki jingtei ka NG 2022: Sacheti

Syllad | The Rising MeghalayaJanuary 30, 2020

SHILLONG: U Chairman Indian Olympic Association Co-ordination Commission For Meghalaya Games 2022, U RK Sacheti u la pynpaw ba lada kwah ba ka National Games kan long ha u snem ba la buh, ka sorkar Meghalaya kan donkam ban sdang noh ban tei ne shna noh ia baroh ki stadium bad ia ka games village ha lane shwa jong u bnai Jylliew mynta ka snem.

U RK Sacheti u la wan poi ha kane ka nongbah Shillong hynnin ka sngi bad khlem da pynslem, u la lum ia ka jingialang bad ki bor sorkar jong ka jylla ban pan jingshai kaba bniah bha na ka liang ka jong ki, kiei ki kam ba ki la dep ban pynkhreh khnang ban lah naka bynta ban pynlong ia kane ka lympung bah ialehkai kat kum ka snem ba ka Indian Olympic Association ka la dep ba kan bhah kyrpang ia ka jylla Meghalaya kaba la dep ba kan soi ruh ia ka soskular jong ka host city contract.

U Sacheti ula iakynduh ia u bah Banteidor Lyngdoh bad ki ophisar ba rangbah jong ka tnat Sports bad kumjuh ia ki dkhot ka Meghalaya State Olympic Committee. U Bah Banteidor u kren skhem beit ba ka lympung ialehkai National games  ba ka jylla kan pynlong ha u snem 2022 kan long katkum ka por bala buh.

U Sacheti u la leit ban jurip ia ka jaka kaba don hapoh ka shnong Umsawli, ka jaka kaba ka sorkar jylla ka la dep ba kan bhah naka bynta ban tei ia ka games village bad ruh ia ka stadium kaban lah ha kaban pynlong ia kane ka lympung ha u snem 2022.

Ka kyndon jong Indian Olympic Association ka long ba kino kino ki jylla kiba pynlong ia ka national games ka long ba 9 bnai shwa ban sdang ia ka national games dei ban pynlong ia kiba bun tylli ki lympung ia pyrshang ne ki test events..

Ka jylla ka don sa ar snem shiteng ban kreh ban tei ïaki jingtei bad lada ym lah ban sdang noh ia baroh ki kam ha lane shwa u bnai Jylliew mynta ka snem, ka jingeh ka lah ban wan ba kan mih paw halor ka jingpynkhreh ïaka National Games 2022.