Nai pyndem tdong ha khmat ki khwan myntoi kyntu ka HYC ia ka KHADC

Syllad | The Rising MeghalayaNovember 4, 2019

SHILLONG: Ka Hynniewtrep Youth Council (HYC) Shillong City ka la kyntu ia ka Khasi Hills Autonomous District Council (KHADC) ba kan nym dei ban pyndem ha ki khwan myntoi kiba thmu ban bam duh ia ka Jaidbynriew tang na ka myntoi ma lade jong ki.

Ka HYC ka la kyntu kynpham ia ka KHADC haba pynrem jur ia ka seng ki nongdie madan kaba la ai kyrteng kum ka Meghalaya Greater Shillong Progressive Hawkers & Street Vendors Association.(MGSPH & SVA) kaba la leit tur matlah, khlem sngewthuh ia ka duh ka dang mynne sha KHADC, tang na bynta ka jingioh nong shimet jongno re jongno.

Katkum ka jingtip jong ka seng, U President jong ka HYC Shillong City u Bah John Lyngdoh u la ong ba kine ki briew ki la sdang duh thiah duh dem naduh ba ka KHADC lyngba ka tnad trade ka la kyndang ia ki bar jylla kiba khaii khlem lisence ha ki thain GS Road.

U la ong shuh shuh ha ka jingiohi jong ka seng, kane ka jingleh ka KHADC, ka la plie lad ia ki nongdie jingdie madan trai muluk, bad ka la khanglad ia kito ki bar jylla ki bym ju apply trading liasen ne ki bym ju ithuh ia ka KHADC da ki phew snem.

U Bah Lyngdoh u la ba ka Seng ka kwah ban pynshai ha kito ki nongshong dukan kiba ialeit lang mynne, ba katkum ka point No 4 jong ka jingdawa katei ka Association ka long ban dawa ai laisen sha ki bar jylla.

“Hato phi ki nongshong iew kiba long ki para doh para snam jong ngi, phi la iabit iabiang haduh katno, ban pynlong ia phi, ban leit kyrpad ai trading lisence sa sha u bar jylla? u la kylli.

U la bynrap shuh shuh lada ki shah ialam bakla ki sngew ban ong ka por ka dang don ia phi ban kylla thiah kylla dem, hynrei lada kadei ka mon lajong, to tip ba ka khana puriskam ba ri ia u bsein, uba ynda u la syaid u puh kylla, kan sa wan jia ha ki.

U Bah Lyngdoh u la ong ha kaba iadei bad ka jingai form ka KHADC ban lum jingtip ia ki nongkhaii khasi ka long kaba dei namar kan iarap ia ki nongdie madan khasi ban pynskhem ia ka jingioh khaii jong ki khnang ba ki bsa pyndap ia ka iing, kin lait ka shah knieh jaka ha ki dkhar bad ban rat dyngkhong ia ka Benami.

U President jong ka HYC  u la ka Seng kam lah khlem da pyrto bad ai mynsiem ia ki pulit enforcement jong ka KHADC khamtam ia u EM i/c trade bad ia u CEM ba phi la shim ia kane ka kamram, kaba ki kum ka jaidbynriew ngi la khmih lynti la slem bah.