Nai pynkylla political issue ia ka ILP ong ka COMSO ia u CM

Syllad | The Rising MeghalayaApril 16, 2019

SHILLONG: Ka Confederation of Meghalaya Social Organization (CoMSO) ka dawa ia u Myntri Rangbah u Conrad Sangma ba ym dei ban pynkylla political issue ia ka ILP hynrei un pyntreikam noh wut wut ia ka khnang ba kan long ka atiar ka ban iada ia ka jaidbynriew Hynniewtrep bad Garo ha Meghalaya.

U Chairman jong ka CoMSO u Bah Robertjune Kharjahrin  ula ong myntri ka tnat Home affair haba u jubab ia ka jingkylli ha Parliament u la ong ba ka jingthmu jong ka ILP system ka long ban iada ia ka jing iohrung bad buhai shnong ki bar jylla ha ka jylla ba treikam ka ILP khnang ban iada ia ki trai Ri ha kata ka jylla.

U  Bah Robertjune u la ong ka jingdawa ban pyntreikam ia ka ILP system kam dei kaba shu sdang na madan madiah hynrei la rai bad ai jingmut da ka High level committee on influx kaba la khlieh da u Bah Bindo M Lanong (Dy Chief Minister) ha kaba ki Minister, MLA, MDC, officer, ki retired IAS , ki sengbhalang, ki proh jabieng bad ki lawyer naduh u Advocate General ka Meghalaya ki la Don Lang bad ki la ia mir jingmut bha.

U Bah Robertjune u la iathuh ba ka Mizoram, Arunachal Pradesh bad Nagaland ki la pyntreikam ia ILP bad ka Sikkim ka pyntreikam ia ka RAP bad ka PAP kaba ia syriem bad ka ILP katba ha Andaman & Nicobar Island ruh kum kane ka permit ka don.

U la ong shuh shuh ba ka Manipur Legislative assembly la lai sien lai wat ka la shna Ain ban pyntreikam ia ka ILP system ha Manipur, dang ha u snem 2018 ka sorkar BJP & NPP ka dang mynjur ban pyntreikam ia ka ILP. Ha Nagaland dangshen ka sorkar ka la buh da ka special committee ban pyrkhat ban pyntreikam noh ia ka ILP ha Dimapur ka nongbah kaba khlem shem la pyntreikam baroh shi katta.