Naka ïingjah sha ka building ïoh ka tnad Veterinary ban hikai iaki samla ban ieng hala ki jong ki kjat ha Rilum Jaintia

Syllad | The Rising MeghalayaDecember 9, 2021

Kan long ka khubor kaba ai jingkyrmen iaki samla kiba la nang la stad ban ioh iaka jinghikai pyntbit nangne shakhmat ha kaliang ka kamri jingri ba har rukom hadien baka tnad Animal Husbandry and Veterinary kala lah ban plie paidbah iaka building thymmai ka shlem ai jinghikai kaba la tip kum ka Vocational Training Centre haka shnong Khliehtyrshi, West Jaintia Hills District haka sngi Balang.

Ia kane ka building thymmai la plie paidbah na u MLA ka Jowai, u ma Wailadmiki Shylla kum u kongsan haka jingiadonlang u MDC Sohmynting Khliehtyrshi Lakhon Dkhar, u Director ka tnad Animal Husbandry and Veterinary Dr. KB Sahkhar, U District Animal Husbandry and Veterinary Officer, West Jaintia Hills Dr. DI Kjam bd kiwei kiwei

U Dr. KB Sahkhar ula ïathuh ba ïaka ïing la tei ha u snem 2011 bad la pyndep ïaka haba sdang jong u snem 2014, hynrei ka jingthmu ka tnad kala shah theh umjpjah hadien baka sorkar kam shym la phai khmat bad pynbiang iaki jingdonkam kane ka jaka ai jinghikai khamtam ha kaban thung iaki nonghikai bad ki nongtrei bad suki suki kane ka iing kala kylla iingjah

Da ka shimkhia ka tnad bad u MLA ka Jowai la ioh ka jingmynjur ban maramot biang ia kane ka iing ha u snem 2020.

“Ngi dang pyrshang ban wad ki lad ki lynti ban ioh jingithuh naka sorkar pdeng lyngba ka Agriculture Skill Council of India bad kino kino ki samla samhoi kiba shah pyntbit ha kane ka kin khamsuk ban ioh ki lad jingiarap haka liang ka iohkam iohjam,” la ong u Dr Sahkhar.

Ula ïathuh ka sorkar Jylla ban kyntiew iaka kam ri jingri bad ban iarap iaki nongri jingri kala pyntreikam ia shibun ki skhim, bad kala sdang ruh iaka Meghalaya Piggery Mission ka mission kaba heh duh haka ri da kaba shim ram naka NCDC haduh 200 klur tyngka ban ai shaki nongri sniang khlem donkam ban siew ïaka sut ban pyndap iaka jingdawa sniang haka jylla. Nalor ka kam ri sniang, ka sorkar kala iaid shait shait ban pynmih ruh iaka dud lyngba ka Milk Mission ban pynbiang dud ia u nongshong shnong ka Jylla. Mynta ban pynbun iaki masi ka tnad Veterinary kala sdang iaka Artificial Insemination ne jingpynshongkha iaki masi ban ioh iaki symbai masi ban pynkhlain iaka jingpynmih dud.

Ula kyntu iaki samla wad kam wad jam khamtam kiba  la pass klas X ban shimkabu iaki lad jingiarap ka sorkar ban ieng hala ki kjat lajong da kaba shim kabu iaki skim Pradhan Mantri Kaushal Vikas Yojana (PMKVY) bad kiwe kiwei ki skim kiba hap haka skill India jong ka MSDE.

U Dr Sahkhar ula khot la wer ruh ïaki samla kiba la pass Class X shalor ban wan sha shim bynta sha ki training kiba ka sorkar ka la mang 120 sngi na bynta jong ki khlem da donkam ban lut eiei.

Ula ïathuh ba ynda la pass ïaka training bad ki samla kiba pyrshang ban trei ïa kata ka kam ka tnad kan ai ïaka kran ïaki 1500 shibnai.

Nakaliang u MLA haba kren kum u kongsan ula wer ia ki samla kiba kwah ban ieng hala ki kjat ban shimkabu ia kane ka lad jingai jinghikai khnang b aka jingthmu jong ka sorkar kanlong kaba jop.