Namar ka jingjia ha Mawlynnong: Khot ka KJCLF ia ka Sorkar ban kham pyrkhing ia ki bynta ki kam jngohkai

Syllad | The Rising MeghalayaDecember 28, 2024

Ka Seng ki kynhun Balang Khristan hapoh ka shatri jong Khasi Jaintia Church Leaders’ Forum (KJCLF) ha ka 27 tarik Nohprah ka la khot ia ka Sorkar Jylla, ka Tnad Tourism kumjuh ia ki nongialam shnong bad nongialam niam ba kin kham pyrkhing halor ki bynta kiba iadei bad ki kam jngohkai pyrthei bad ha ka jingiadei ha ka imlang sahlang.

Kane ka la wan long ruh hadien ka jingjia ba dang shen hapoh ka iingmane ha ka shnong Mawlynnong, East Khasi Hills ha kaba uwei u shit niam Hindu u la rung beain hapoh ka iingmane da kaba  pynkhein ia ka jinglong ba kyntang jong ka iingmane Blei.

“Ka Forum ka khot ruh ia ki nongwan shangkai pyrthei kiba wan jngohkai sha kane ka Jylla jong ngi ba ki dei ban burom bad long phikir ha ki jingleit shangkai bad ha ki jingiakynduh bad ki jingiakren ia khana,” ong u Secretary ka KJCLF u Rev Dr EH Kharkongor ha u kyrwoh.

U la ong ba ka video kaba la saphriang ha ki social media ba la pynmih da uwei u briew uba kyrteng u Akash Sagar ka pyni ia u katba u dang pyrta hakhmat ki arngut ki paralok jong u hapoh kawei ka iingmane ha Mawlynnong ha kaba u la pyrta ia ka kyntien ‘Jai Shree Ram,’ kata ka jingleh kaba long pyrshah ia ka jinglong kyntang jong ka iingmane kaba la pynkhih bitar ia ki nongshong shnong bad ia ki paid Khristan hapoh ka thain hi baroh kawei.

U Rev Kharkongor u la ong ruh ba shisien peit la iohi ba kane ka jingleh kaba beain namar ka jingleit rung tuh hapoh ka jaka ba kyntang da u nongleh social media ha ryngkat kine ki jingleh beain kiba thmu ban pynpaw pyrthei ia lade lyngba kane ka jingpyrshang ka bym seisoh.

“Hynrei, watla katta ka jaka bad ka por jong kane ka jingjia bad ka jingpyllait paidbah la iohi kumba ka dei ka jingpyrshang ban pynmih ia ka jingiakynad lyngba ka jingsngew iapher niam da kaba leh ibein bad pynpaw ia ka jingshun halor ka jingngeit niam jong ki trai muluk da ka jingthmu ban kyntiew ia ki mat jong ka niam heh paid. Ngi lah ban pynkynmaw ia ki jingjia ba dang shen bad kiba dang iaid kum ka jingpyrshang ban ioh rung shapoh ka krem Mawjymbuin ha Mawsynram, ka jingialap ban ai jingiada ia ki Masi, ki jingkren bein ia ki kolshor jong ki Dima Hasao ha Haflong, ka jingbyrthen pynkhihwin shwa ka Khristmas bad ka jingbyrthen khang surok hapdeng ka Assam bad Meghalaya, ka jingpynthud ia ka jingrakhe Khristmas jong kawei ka Skul ha Palakkad Kerala, ka jingpynthud ia ka jingrakhe Khristmas ha ki jaka ba marjan ka St Joseph’s Cathedral ha Lucknow, ka jingbym lah ban pynbeit da kaba da thmu halor ka jingiakynad ha Manipur bad kiwei kiwei,” u la ong.

“Kaba sngewsih ka long ba u Myntri Rangbahduh ka ri u Narendra Modi haba kren ha ka jingrakhe Khristmas ba dang shen kaba la pynlong da ka Catholic Bishops’ Conference of India (CBCI) ha Delhi u la pynpaw da kaba ong, ka pynsngewsih ia ka dohnud jong u haba don ki jingpyrshang ban pynphriang ia ka jingleh donbor ha ka imlang sahlang’. U la pynpaw ba ‘ki jinghikai U Trai Khrist ki rakhe ia ka jingieit, ka jingiatylli, ka jinglong shipara bad ka long kaba kongsan ba baroh ngin trei ban pynlong ia kane. Hynrei um shym la lah ban pynbeit bad tehlakam ia ki mat jong ka jingshun bad jingiapher jaitbynriew ba la tap da ka jainkup jong ka jingpyniapher niam bad jaitbynriew kumba la iohi ha Manipur bad kiwei kiwei ki jaka ha ka ri,” bynrap u Rev Kharkongor.