Namar u Cyclone Remal: Pynbna khang khyrdep ka Sorkar Jylla ia ki skul bad kolej

Syllad | The Rising MeghalayaMay 27, 2024

Ka Sorkar Meghalaya ka la pynmih ia ka hukum ban khang khyrdep ia ki skul bad kolej ha ka 28 tarik Jymmang namar ka jingjur ka jinghap slap bad ka lyer na ka daw ka jingsyllad u cyclone Remal ha Bay of Bengal.

Ia kane ka hukum khang khyrdep ia ki jaka pule la pynmih lyngba ki Deputy Commissioner jong ki District bapher bapher ka Jylla.

Ka Tnat Indian Meteorological Department (IMD) ka la pynmih ia ka jingmaham halor ka jingther jong u ‘lapbah bad ka lyer kaba jur ha Jylla naduh ka 27 haduh ka 28 tarik mynta u bnai.

Kumta khnang ban shim ia ki lad jingiada na kino kino ki jingjia kiba lah ban wan jia la hukum ia baroh ki skul, kolej, universities kin khang khyrdep ha ka 28 tarik mynta u bnai. Ia kane ka hukum khang khyrdep ia ki jaka pule la pynmih ruh da ki Deputy Commissioner ka West Jaintia Hills, Ri Bhoi, East Garo Hills, East Jaintia Hills, West Garo Hills, South West Garo Hills bad kiwei.