Namar u mombati pluh ka ïing ha khappud, kner jingiarap ka KSU sha ka lanot

Syllad | The Rising MeghalayaJuly 21, 2022

Ka KSU Narpuh Circle haka sngi Palei kner jingiarap sha kawei ka lanot pluh ïng ha shnong Ratachera kaba la shah bam shngiam haka ding tang namar ka jingthang mombati namar ka jinglip ding khah khah.

Ka KSU kala lei tai jingiarap haka jingialam u Phanuel Tongper vice president, u Poibiang S Dhar finance secretary, KS Suchiang general secretary KSU East Jaintia Hills District Unit bad kiwei kiwei. La iadonlang ruh u waheh shnong Ratacherra u Desous Pohshna.

Ka KSU kala kynnoh ba ding kala bam duh ia kane ka ïing bamduh ia katei ka iïng haka miet sngi ba ar haka por 8 PM. La iathuh ba ka ding kala ioh bamshngiam ia kane ka iing ka dei namar ka jingduh ka bording bad kum klet ia u mombati hadien ba ki khun ki kti katei ka longiing kila dep ban pule kot kila mih leit kai sha ki para marjan ïng, namar ki kmie ki kpa kim don ha ïing bad ki dang shong die dukan.

Ka KSU kala ong ba kam lah khlem da kynnoh ia ka sorkar khmatam ka MeECL ka bymlah ban pynbiang bording. “Lada don light kitei ki khynnah kim donkam ban thang mombati,” la ong u Phanuel Tongper bad bynrap ba ka sorkar ka dei ban shim jingkitkhlieh ia kum kine ki jingjia bad ruh ban iarap lem ia kum kine ki lanot pluh ding.

Ula ong ruh ba “Lah palat shisha kane ka jingleh kput ka MeECL ia ka thaiñ Narpuh. U Myntri Rangbah Conrad K Sangma u la kam ba la weng ia ka load shedding, pynban ha Narpuh ka load shedding ka dang treikan man ka sngi. Ym don slap ne lyer, hynrei ka light ka lip hi, bad ka tnad pynmih bording ka MeECL thik thik ka pynpoi bill man la u bnai.”