Nang ioh bor ka JHTOA, kyrshan ka North East Truck Owner Welfare Society iaka dawa bai kit thymmai

Syllad | The Rising MeghalayaDecember 14, 2021

Ka jingiakhih jong ka Jaintia Hills Truck Owners’ Association (JHTOA) kala poi sha ka sngi kaba phra bad kala nang ioh ka jingkyrshan na kiwei pat ki synjuk kaba kynthup iaka North East Truck Owner Welfare Society (NETOWS) ban pynjur iaka jingiakhih pyrshah iaki karkhana dewbilat ha Rilum Jaintia ban dawa ban pyntreikam iaka bai kit bai bah thymmai kaba la pynbna da ka sorkar naduh u Nailur (September) jong u snem bala dep.

Ka jingiakhih ka JHTOA mynta ka sngi kala sdang sa ban khang iaki trok kiba kit dewbilat bad clinker sha Lower Assam ba kynthup iaka Silchar, Kalain, Karimganj bad kiwei kiwei ki jaka.

La sakhi ki nongialam ka JHTOA bad ki trai trok kila hiar khrui sha Lumshnong, East Jaintia Hills ban khang iaid iaki trok ba hiar sha lower Assam.

Ka JHTOA kala nang nang ioh bor hadien ba ka NETOWS kala ai ka jingkyrshan bad phah da jingthoh ban ai ka jingkyrshan kaba pura ia kane ka jingiakhih.

Ka NETOWS kala pynpaw ba ki ruh ki iakynduh ka juh ka jingeh bad mynta hadien ba la thied trok ki karkhana kila iakynduh mawsiang bha ban kamai kajih.

“Ka sorkar ka ai subsidy ban seng ia kine ki karkhana ban wanrah iaka lad iohkam iohjam ki trai muluk, pynban kine ki karkhana kila pynduna iaki nongtrei trai jylla bad kane ka jia ha Assam bad Meghalaya. Nalor kata kine ki karkhana kila thied iala ki jong ki kali motor bad thep mar shuwa iaki bad pynslem iaki kali jong ki trai muluk ban ioh thep mar bad kit mar kaba ktah iaka ioh ka kot jong ki nongbuh trok bad shem shitom ban siew iaki ram ha bank,” la ong ka NETOWS.

U Nidamon Chullet president JHTOA ula ong ba na kaliang ka JHTOA kala thmu ban pynjynsur iaka jingiakhih ban ailad iaki trai shnong ban kit dewbilat, hynrei namar ba mih ki kynram kynram la kyntu ia baroh ki trai shnong ban iaishah bad ka JHTOA tad haduh bala urlong ka jingdawa bad ioh iaka bai kit bai bah thymmai kaba la pynbna da ka sorkar.