Nang jur ka jingiakynad knieh jaka hadpeng ka Maskut bad ka Moodymmai, wan pynjem ki Pulit

Syllad | The Rising MeghalayaFebruary 9, 2021

Ka jingïakynad iaknieh jaka puta hapdeng ka Shnong Moodymmai bad ka shnong Maskut ka la thnam shuh shuh haka sngi Nyngkong, hynrei donbok ka jingwan kloi ki Pulit kila lah ban pynjem ia kane ka jingiakynad bad lait n aka jingia um snam.

Ki nongshong shnong ka Moodymmai ki kam trai ïaka jaka ha ‘Khloo Bamlang’ kaba don ha ki thaiñ Wah Mynso kaba long ha khappud jong ka East Khasi Hills bad West Jaintia Hills. Hynrei ki  nongshong shnong jong ka Maskut ruh ki kam trai ïa katei kajuh ka jaka bad ai kyrteng ruh ïaka kum ka ‘Lumpomlum’.

Ki nongshong Shnong ka Moodymmai ki la mih paidbah ban leit pyrshah jur ïa ka jingdie jaka ha ‘Khloo Bamlang’ kaba don ha Wah Mynso ïa kaba la die sha u Sajay Laloo ha u snem 2018 ha ka jingheh kaba 70 hajar Sq meter.

U Waheh Shnong ka Moodymmai u Bah Nangmanbha Laloo bad u Secretary Shnong u Bah Ha-O-Ni Pariat, kila kynnoh ba ïa katei ka jaka la die sop sop da ka Shnong Maskut khlem ka jingtip jong ka Shnong Moodymmai kaba dei ka trai jong kane ka jaka.

U Bah Nangmanbha Pariat ula ïathuh ba ka Shnong Moodymmai ka la ïoh jingtip ïa kane jingdie jaka dei ha u bnai Kyllalyngkot (January) 2021 yada haba la don ka jinglur bad pyntrei ïa kane ka jaka. Haba ka Shnong Moodymmai ka la tohkit bha bad ka lap ba uwei u briew uba kyrteng u Sajay Laloo ula dep ban thied ïaka na ka Shnong Maskut ha u snem 2018.

“Kaba pynkyndit ïaka Moodymmai ka long ba ïa u pud sawdong la pynïapher haba apply ïaka Land holding bad kumjuh ruh ïaka kyrteng jong ka jaka la ai Land Holding Certificate da ka kyrteng ‘Lumpomlum,” la ong u Bah Laloo Waheh Shnong Moodymmai.

Ula ong haba ïadei bad kane, ka Shnong Moodymmai ka la dep ban ujor arsien sha ka District Council kumjuh shaki bor pulit jong ka West Jaintia hynrei ymdon ba patiaw bad haka jingbym banse ki la pynlong da jingmih paidbah ban pyni ïaka hok kynti bad jinglong trai jong ki ïa katei ka jaka.

Ula ïathuh ba ka Shnong Moodymmai ha u snem 2011 ka la ïakhun mukotduma pyrshah ïa u Wonderful Shullai halor ka jingkam jong u ïa katei ka jaka bad ka ïingbishar jong ka District Council, Jowai ka la rai na ka liang ka Shnong Moodymmai katkum ka order 02.02.2015 ha kaba ïaka jaka ka Shnong Moodymmai bad ka Shnong Mookyndur kidei hok kynti.

“Haki snem ba leit ki nongrep ka Shnong Moodymmai ki don hapdeng ka jingshong suk shongsaiñ haka liang ka rep ka riang haba ki rep ha Sung Valley hynrei hadien ba ka Maskut ka la ïoh ïa la u jong u Dolloi ki nongrep ki shem jingeh haka rep ka riang,” ong shuh shuh u Waheh Shnong.

Ki nong Moodymmai ki kynnoh ba u Dolloi ula die pathar ïaki jaka kiba ka Shnong Moodymmai ka la ri la sumar kaba ki la ïoh pateng naki longshwa manshwa bad kum ki nongshong Shnong ki don hapdeng ka jingjynjar namar ka jingleh donbor bad leh bieij jong une u Dolloi Maskut.

U Bah Laloo ula pynpaw ka jingsngewkhia halor ka jingai Land Holding khlem da tohkit bha ba kane ka jaka ka don haei bad ula kynnoh ruh ba ka JHADC ka tip bha ba kane ka jaka ka don hapoh ka jingia khajia.

La kyntu ïaki bor ba dei peit ban shim khia ban pynbeit ïa kane ka kam bad dawa ruh ban pyndam ïa katei ka Land Holding ba la ai sha u Sajay Laloo katba ka ïingbishar kam pat bishar hok mano ba dei trai ïa katei ka jaka.

Hadien kane ki nong Moodymmai ki la hiar sha Sung Valley ban jurip ïaka jingshah pynkhyllem iaki dieng bah eh bad ba dieng rit jong ki nongrep ka Shnong Moodymmai. Ki nong Moodymmai ki kynnoh ba ïa kine ki dieng la pom pathar da ki nong Maskut.

Katba ki nong Moodymmai ki dang ïaid sha khmat ban jurip ïa kitei ki dieng, ki la ïakynduh ïaki nong Maskut kiba dang pynkhuid surok bad hangtei ka la mih ka jingïahylla pyrshah na baroh arliang kynhun bad mih ruh ka thma ktien kaba la jur bha hynrei da ka jingdon jong ki pulit jong ka Ummulong Beat House kam shym la jia kano kano ka jingjia kaba sngewsih hapdeng kine ki ar shnong.

Haba ïakren bad u Waheh Shnong ka Maskut u Bah Kyrsiew Kharbihthai ula kam ba kane ka jaka ka hap hapoh ka Elaka Maskut.

“Haoid ngi die ïaka jaka sha u Sajay Laloo hynrei ka jingdie kadei daka jingpynbeit jong ka Shnong Maskut”, ong u Bah Kyrsiew

Haba ïadei bad ka jingpom dieng ula pynshai ba ka Shnong Maskut ka juh pom dieng shisien shisnem na ka bynta ka kam Shnong bad ïaki dieng ka pom ha khlaw jong ka Elaka Maskut.

Kane ka jingiakynad hadpeng ka Maskut bad ka Moodymmai kala neh la bun bun snem namar ka jingbym lah u dolloi ban pynbeit ia kane ka kam pud sam ki shnong.

Ia ka Maskut ka district konsil kala ai elaka na ka bynta ban iada ia u pud u sam ka Jaintia kaba don markhap bad ka East Khasi Hills, hynrei kane ka shnong/elaka naduh ba kala ioh elaka kaba pura kala mih har rukom ki kam khajia majia hadpeng ka Maskut, Moodymmai, Larnai bad kiwei kiwei.