Nang pynjur ki nongtrei ASHA ia ka jingiakhih da kaba iaid paidbah ha Jowai

Syllad | The Rising MeghalayaNovember 14, 2023

Ki nongtrei ASHA na kylleng ki jong ka thain West Jaintia Hills District hapoh ka shatri jong ka Meghalaya ASHA Workers Union haka sngi ba Ar ki la pynlong da ka jingiaid paidbah ne rally ha nongbah Jowai ban dawa na ka sorkar jylla ba kan pynkiew noh ia ka bainong ka jong ki.

Kane ka jingiaid rally kaba rah lang ia ki placard ryngkat ki jingthoh dawa la pynlong da ka West Jaintia Hills District ASHA Association bad la sdang ia ka na madan Tympang Club bad iaid lyngba ia ka Iawmusiang, Loomsooiung Newhill bad pynkut ha madan Ladthadlaboh, Jowai.

Ha kane ka jingiaid rally da ki spah ngut ki ASHA bad don ruh ki ASHA kiba bah lang ia ki khun rit ban iaid lynter lynti ryngkat ki jingpyrta ‘Ngim lah shuh ban treimon sngewbha, wat iehbein ia ngi ko sorkar’, ‘MDA Government Down Down’.

Nalor kata katkum ki jingthoh ki ASHA ki pynpaw da kaba ong, ‘Ia ngi phi siew 2000/-, phi kam pat 5000/-, kaba tam 3000/- ka don bad no?“

Ha madan Ladthadlaboh la pynlong ia ka jingialang ha kaba ka President West Jaintia Hills District ASHA Association ka Kong Fionaliza Timung kala ai jingkren pdiang bad la ioh iaka jingkren na ka Kong Theodaris Dhar ASHA Laskein Block, ka Kong Bida Khonglah ASHA Amlarem Block, ka Kong Emlang Mukhim ASHA Thadlaskein Block bad la ioh ka jingrwai na ki ASHA Khliehtyrshi PHC.

“Ka sorkar jylla ka dei ka nongpyn-iasniew, ka kwah ban pynialeh thma ia ki ASHA bad ki Anganwadi bad ka kwah ban pynialeh thma ia ki ASHA bad ki bor Shnong,” ong ka ka Kong M. June Myrsing hadien ba ka Myntri ka koit ka khiah ka Dr. Ampareen Lyngdoh kala ong ba ki ASHA ki wan ban ujor ia ka jingioh jong ki Anganwadi.

Ka Kong Myrsing ka la ong ba ka Meghalaya ASHA Workers Union kam pat ju ujor eiei ha kaba iadei bad ki nongtrei Anganwadi namar ki sngewthuh ba kum ki ASHA ki don ka jingiatreilang bad ki Anganwadi kiba don ha ki Shnong ki thaw. Hynrei, Kat ka ka Myntri kaba shong ha ka shuki ka la dei ban pyrkhat kumno ban kren ym ban pyniakhih thma ia ki briew kiba don hapoh kajuh ka Jylla bad lada ki don kino kino ki jingialeh ne jingeh dei ma ka kum ka Myntri ban shim iaka jingkitkhlieh bad ban sop lane ban tem ia ka ding hashwa ba kan klang, ka la ong.

Ha kaba iadei bad jingong ka sorkar ban ai training ha ki VHC (Village Health Council) ba kin trei ia ka kam katba ki Asha ki dang don haka jingsangeh treikam ne strike, ka Kong Myrsing ka la ong ba ka sorkar ka la sdang ban pyniashrut ia ki ASHA sa bad ka shnong ka thaw.

Ka la ong ba kam dei ka kam kaba suk ia ki VHC ba kin lah ban leh ia ka kam jong ki ASHA namar ia ki ASHA la ai training da ki bun bun snem na bynta kane ka kam. “Kane ka sorkar ka la shu krem lamwir bad pyrshang ban pyntieng kohtympan ia ka Meghalaya ASHA Workers Union, hynrei ki nongtrei ASHA ka Meghalaya ki dei ki riewshlur bad lada don mano mano kiba nud ban weng ia ki ASHA haka por jong ka jingiakhih ka Meghalaya ASHA workers Union kan nym shongthait.

Shuh shuh na ka liang ka President ka la pynbna ruh ba ka Meghalaya ASHA Workers Union kan ym leit trei ne pyndem katba ka sorkar Jylla kam pat ai kano kano ka jingpynthikna kaba pynhun ia ki nongtrei ASHA.