Nang sawa jam ka jingdawa pynkynriah iaki BSF na Sonapyrdi, kynriah mardor shuwa ban jia kaba sniew ong ka KSU iaka Sorkar

Syllad | The Rising MeghalayaApril 26, 2024

Hadien ba ka Border Security Force (BSF) Frontier Headquarters kala kyntait iaka jingkynnoh thombor iaki paidbah bad iaki kali shimet ha Sonpyrdi, ka Khasi Students’ Union (KSU) Narpuh bad ka East Jaintia Hills District Unit kiba la khie bitar kila tur puk sha jan ka jaka buh khyrdop ka BSF ha Sonapyrdi haka 26 tarik Iaiong.

Ha kane ka jingtur ka KSU kala pynlong jingialang ban dawa kynriah iaki shipai BSF na Sonapyrdi. La iadonlang ki nongialam shnong bad ki nongshong shnong ba shah ktah naduh Hingaria, Umstein, Sonapyrdi bad kiwei kiwei ki shnong.

U nongialam ka KSU, u Bah KS Suchiang haba kren haka jingialang ula ong ba ka sorkar ka dei ban kynriah mardor ia ki BSF na Sonpyrdi shuwa ban jia kaei kaei kaba sniew namar ki long ki mawjynthud ia u paidbah.

Ula ong ruh ba ki BSF ha ka jaka ba kin ai jingshngain iaki paidbah, ki ktah kti bad thombor kylla ia u paidbah ba iaid ba ieng ha kane ka jaka.

“Bunsien ngi la ujor sha ka bor district bad shaka sorkar ban kynriah iaki BSF na Sonapyrdi, phewse haduh mynta kine ki shipai ki dang neh hajuh bad ki pynthud iaka shongsuk shongsain u paidbah ka thain Narpuh bad ki shnong khappud,” la ong bah KS Suchiang.

Naduh ki khynnah skul, ki riew kynthei kila shah thombor ha ki BSF bad ki mar bam jong ki paidbah kila sniew naka jingkhynra khlem nongrim ki BSF tang ban pyndik ia u paidbah, katba ki kam sniew ha border ne khappud ki iai jia, hynrei ka BSF kam lah satia ban tem ia ki kam sniew ha khappud India Bangladesh.

Ula buh jingkylli ruh ki BSF kila leh aiu halor ka jingshah pyniap ka longkmie ha Donaskur bad u (L) Sylvanus (Chiang) Dhar. Kumta ka bha iaki ban shong sha Border ym ha ki jaka paidbah.

U Waheh Shnong Sonapyrdi ma E Lamare, ula buh ther tyngeh iaki BSF hato kim lehrain ban thombor iaki briew kiba iaid ba ieng. Ula buh jingkylli ruh mano ba ai jingbit iaki ban buh khyrdop ha katei ka jaka, haba na kaliang ka shnong kam shim la ai jingmynjur.

“Lashai ka sngi phi dei ban pynkynriah ia kane ka khyrdop bad ula ong ha surok phi don ka bor ban khynra phi lah ban leh, hynrei kynriah iaka khyrdop mardor lashai hi ka sngi,” la ong u ma Lamare bad bynrap ba ka tnad Police bad ka District Administration ki dei ban pynkynriah.

“Phi (BSF) dei ban lehrain ha ka jaka ba phin ai jingaida iaki nongshong shnong, phi pynthud pynban ia u paidbah bad ka shongsuk shongsain,” ong u ma Lamare.

Kumta ki dei ban mih mar mar na katei ka jaka, bad ula banjur ba ka district administration ka dei ban shim ka jingkitkhlieh ban leh eiei ban kynriah ia ki BSF na Sonapyrdi, ong u Waheh Shnong Sonapyrdi.

Ha kane jingialang la donlang u president ka KSU, East Jaintia Hills District Unit Streamly Nongjop Suchen bad kiwei kiwei ki nongialam KSU, nongialam shnong bad nongshong shnong ka thain Narpuh.