Nga dei u nongiarap ngam dei ka bulldozer ong ma Sniawbhalang ha Amlarem

Syllad | The Rising MeghalayaFebruary 20, 2023

U ma Sniawbhalang Dhar haba kren haka jingialap elekshon ha Amlarem ula ong “Nga dei u nongïarap bad ngam shym la wan hangne kum ka bulldozer, hynrei u nongpynbha pynmiat ïaka jingjot jingpei jong ka constituency.”

“Nga wan ban pan iaka jingkyrshan jong phi naka bynta u Stephanson Mukhim bad wat artatien ba u Ma Stephanson un long u nongjop na Amlarem Constituency hadien ka jingniew vote,” la ong u ma Sniawbhalang bad bynrap ba ka Amlarem constituency ka dang don shibun ki jingduna.

U Ma Sniawbhalang haba kren shuh shuh haka jingialang ialap elekshon haka sngi Saitjain ha Amlarem ula ong kiba bun balang ki ong ba ïa u Stephanson Mukhim la pynïeng da u ma Sniawbhalang Dhar bad lada jop u Stephanson un shah pynïaid (control) ha u. Haba pynshai ula ong ba lada u jop u Stephanson ha kane ka election un ym shong shuh ha trailer un shong shisyndon ha ïing shetja (kynhun myntri) namar ngi la thikna ba ka party NPP kan ïoh beit ban bat ïa u lakam synshar.

Ula kop ba NPP kan jop 15 seat na rilum Garo bad 18 seat na rilum Khasi Jaintia. U ma Sniawbhalang ula pynbna lypa iaka shuki myntri sha u Stephanson Mukhim ha kane ka jingialang.

Ula kyntu ïaki paidbah ka Constituency ba kim dei ban ïeh ïa u Stephanson hynrei ban don ryngkat bad u khnang ba ynda ula jop un sumar sukher ïaka Amlarem Constituency bad ba ki paidbah ka Constituency kin lait na ka jingïam briew.

Ula ong ba u MLA uba mynta wat lada u don makna haka bor hynrei ki jingduna ka Constituency ki long kiba bun. Kumta ula kyntu ban jied ïa u Stephanson Mukhim kum u nongmihkhmat jong ki bad u kular paidbah ba kaei kaba um lah u Stephanson ban leh, ma u, un don ha syndah jong u Stephanson.

U Stephanson Mukhim haka jingkren ula pynsngew ïaka nongrim jong u, ban pynbha pynmiat ïaka Constituency khamtam ïaka Amlarem kaba dei ka ïitkhmih jong ka Constituency.

“Ka Amlarem Sub-Division kadei kaba la rim tam kaba la jan kynjoh shaka jingdap 50 snem hynrei kadei pat ka Sub-Division kaba dang sahdien tam,” ong u Stephanson. Ula ong shuh shuh “Lada peit ïaka Constituency lah ban ong ba ka la kiew shakhmat hynrei lada phai pat sha ka Headquarter, ka long kaba dang sahdien kynthup naduh ka jingbym biang ki lynti synkieng, ki umbam umdih bad kiwei kiwei ki kam pynroi bad lada poi haka thong ka thong jong nga ka long ban wad ki lad kumno ban pynphuh pynphieng bad pynitynnad ïaka.”

Ula kyntu ïaki paidbah ka Constituency ba kim dei shuh ban ngop haka jingpynbiej jong u MLA u Lahkmen Rymbui kumba ula pynbiej ïaki ha u snem 2018 ban pynïoh kam ïa 3000 ngut ki khun samla ka thaiñ.

Ula ong ba ma u, um nud ban kular eiei hynrei kaei kaba u kular ban leh ka long ba un long u nongprat lynti ïaki samla kumno ban ïeng hala ki jong ki kjat bad ka jingïoh kam sorkar ka shong haka jingtrei shitom jong ki samla ym haki MLA khamtam ha kane ka juk ïabeh donkam ka jingtrei shitom nalade khnang ban phyrnai la lawei.