Nga dei uba ïoh bun eh ki skim shna surok napdeng ki para MLA Jaiñtia ong u Nujorki Sungoh

Syllad | The Rising MeghalayaFebruary 27, 2020

U Ma Nujorki Sungoh ula kam ba u dei uba ïoh bun eh ki projek shna surok na baroh ki paralok MLA jong ka Rilum Jaiñtia.

“Ha kine ki ar snem ka jingïaid lynti kum u MLA ka 4-Mowkaiaw Constituency na baroh ki paralok MLA na ki 7 ngut na Rilum Jaiñtia, nga dei uba la ïoh bun eh ki skim shna surok,” la ong u Ma Nujorki Sungoh ha ka jingplie bad buh maw nongrim ban tei bad shna pynbha ïa ki ar tylli ki projek jngohkai pyrthei ha Iooksi, Mowtyrshiah bad ka jingbuh mawnongrim ban shna ïaka surok shnong Mukhap haka sngi Balang.

Ha kane ka jingbuh maw nongrim ïa kine ki projek ka kongsan ka dei ka Kong RV Suchiang IAS, Additional Chief Secretary jong ka Sorkar Jylla kaba dei khmih ïaka tnad Finance. La ïadonlang u CVD Diengdoh IAS, Director of Tourism, u Secretary PWD Bah PR Marwein bad kiwei kiwei ha ryngkat ki nongialam shnong.

Haba kren shuh shuh kum u MLA ka thain Mowkaiaw “Nga la pyrshang katba lah ki bor ban leit kyrpad ïaki ophisar, engineer kumjuh ka kong RV Suchiang ba kin ïarap ban wanrah ïaki skhim pynroi ha kane ka shnong kaba sahdien khnang ba ka thain kan roi kan par. Ym tang ban pynbha ïaki surok, hynrei ha baroh kiliang naduh ka koit ka khiah bad ki skul nga la pyrshang ban thaw ki lad ki lynti kumno ban ïoh ïaki lad jingïarap ban pynbiang ïaka jingdonkam.”

“Khlem ka jingïatreilang ki ophisar kam dei kaba suk ban ïoh ïaki kam pynroi, kumta ha kine ki ar snem la pyrshang da ka jingïatreilang ryngkat ryngkat ki ophisar ka Mowkaiaw Constituency kala ïoh 15 tylli ki surok shnong kaba kynthup na ki skim sorkar Jylla, PMGSY, Nabard lyngba ka RIDF XIV haka shnong Mukroh bad Mukhap kynthup ïaka surok na BIar sha Saphai, ka surok kaba pynïasoh ïaka Garampani. Kane ka surok ka don 28 KM bad la bei pisa da ka World Bank haka jinglut kaba ₹63 Klur 83 lak,” ong u ma Nujor.

U Ma Nujor ula ong, ka surok Mukhap ka don 3 KM ka jingjrong ban yn shna ka pynkiang kaba 8 meter bad kane ka jaka la ai sngewbha da ki nongshong shnong ka Mukhap. Ula ong kane ka dei ka nuksa kaba bha ba kiwei ki shnong ki dei ban bud khnang ban suk ka pateng ban wan hakaliang ka surok.

Ha kaba ïadei pat bad ka skim pynbha ïaka Iooksi Park, la ïoh haduh ₹10.87 Klur bad kane la bei pisa da ka Ministry of Tourism, Govt of India lyngba ka  Swadesh Darshan Scheme, kaba ka jingthmu jong kane ka skim ka dei ban shna ïaki tourist circuit ne ki jaka ban ïoh ki nongwan kai suwari ban shang bad ban sah bun sngi ha ki bun tylli ki jaka haka juh ka thain.

U Ma Nujorki Sungoh, ha kaba iadei bad ki kam jngohkai ula kyntu ïaki paidbah ban ai ka jingïatreilang bad ki tnad sorkar bad ban pynthymmai ïaka jingmut jingpyrkhat kumno ban pdiang ïaki briew kiba na bar bad ban khring ïaki ban sah sha kane ka Rilum Jaiñtia kaba dang bun ki jaka jngohkai kiba itynnad.

Ka RV Suchiang kala ïaroh ïaka jingshimkhia ka shnong Mowtyrshiah bad Iooksi ban sdang shuwa nalade ban pynbha ïa ki jaka jngohkai bad kane ka dei ka nuksa kaba bha ba ki paid nongshong shnong kila pyni ba kilah ban pynïaid ïaka kam.

Ki don bun ki jingmyntoi ba ka sorkar ka ai, hynrei ka donkam ïaki nongshong ban pyntbit ïalade ha kano kano ka kam bad ka sorkar ka ai ruh ki jinghikai kiba lyngkot kiba 2-3 bnai ban sdang ïa ka kam.

Ha Iooksi yn tei ïaki dukan Café, ka Tourist information Centre, ki Traditional Hub bad kiwei kiwei ki jaka ïalehkai pynbyrngia.

Kala ban jur ïaki paidbah, ka synjuk ba pynïaid ïaka Iooksi Park ban bud ïaki nuksa jong kiwei ki shnong kum ka Sohra, Mawlynnong kiba don ha Jylla ban pynbna ïaka jingdon jong ki bad ban khring ïaki briew ne ki nongshakai suwari. Kala ai nuksa baka Sohra mynta tang na ka Homestay bun tylli ki longiinig kila ioh jingmyntoi bad ban shna ïa kine ki iing ka sorkar ruh ka ai jingiarap.

Hadien pat la buh mawnongrim ïaka jingtei pynbha ka tnad Tourism ïaka Lumtiniang Park kaba don ha Mowtyshiah haka jinglut kaba ₹28 lak tam. Ka tnad Tourism kala ker pynbha  ia ka jaka jong kane ka park. Kane ka park ka don halor u lum bad lah ban ïohi kyndiang ïa u lum Makashang bad ruh kane ka jaka khring bha ia ki briew ban peit iaka sngi haba ka mih bad sep.