Nga ieh ha ka jingstad ki paid nong Mawlai; Nga la noh synniang shibun sha ki kam pynroi: Teibor Pathaw

Syllad | The Rising MeghalayaJanuary 31, 2025

U MDC ba mynta ka Mawlai constituency u Bah Teiborlang Pathaw u la pynthikna ban wanrah shuh shuh ia ki kam pynroi na ka bynta ka jingmyntoi jong ki paidbah bad ka constituency lada un shah jied biang ha kane ka elekshon sha ka Khasi Hills Autonomous District Council (KHADC).

Ia kane u Bah Teibor u la pynpaw haba leit thep kyrteng hynne ka sngi 31 tarik Kyllalyngkot kum u kyrtong shimet ha ISBT, Mawiong, kata hadien katto katne por ba u la mih noh na ka National People’s Party (NPP) shwa ka elekshon MDC ka ban long ha ka 21 tarik Rymphang. 

Haba kren sha ki lad pathai khubor u Bah Teibor u la pynpaw ba u la noh shibun bah u synniang na ka bynta ka constituency ha kine ki hynriew tylli ki snem kiba la leit noh.

“Nga la trei shitom bad mynta Nga ieh ha ka jingstad jong u paidbah Mawlai ban rai la Nga dang dei ban shah jied biang kum u nongialam jong ki namar ki la sakhi ia ki jingnoh synniang ki jong nga sha ka constituency lyngba ki skhim pynroi bapher bapher,” u la bynrap.

U Bah Teibor u la kam ruh ba ka jingtreikam jong ka KHADC ba mynta ka la lah ban leh ia ka kam ba bha khamtam ha kaba aijingmynjur ia kiba bun ki Bill kiba kongsan ki ban iarap ban pynkhlain shuh shuh bad ban iada ia ki trai ri trai muluk.

“Ka Land Act kaba la ioh dang shen ia ka jingmynjur jong u Lat ka Jylla kan long ka jingkyrkhu kaba khraw ia ki paidbah ka thain,” u la ong.

Une u MDC ba mynta u la pynthikna ruh ba lada un shah jied biang kum u MDC un iai bteng ban trei shitom shuh shuh namar ki dang don shibun kiei kiei kiba dang dei ban leh ban kyntiew ia ka roi ka par hapoh Mawlai constituency.

Haba kylli, u Bah Teibor u la pynshai ba ha ka jingshisha u la jop ia ka elekshon ha u snem 2019 kum u kyrtong shimet bad ha kane ka kynti ruh ki paidbah ka constituency ki kwah ba un iakhun kum u kyrtong shimet.

U la ong ruh ba ha ka jingsngew ka jong u, ka party ka dei tang ka uniform, hynrei kadei beit ia u briew shimet kaba kham kongsan. “Lada nga jop, ngan hap ban trei, ym ka party,” u la bynrap.