Nga jop na ka party NPP nga sngew uba donbok tam, hynrei phai sha ka JHADC nga dei uba sniewbok tam, ong u Saron kyrtong Congress na Jowai South

Syllad | The Rising MeghalayaFebruary 1, 2025

U Ma Saron Pasweth u MDC uba la jop haka sien nyngkong na ka National People’s Party (NPP) ha u snem 2019 bad u ban mih aireng na ka Congress ha kane ka sien ula ong “kum u MDC uba la jop ia ka elekshon na ka Party NPP nga sngew ba nga long u ba donbok na kiba donbok tam, hynrei ynda phai pat sha ki jingeh kiba ka JHADC ka iakynduh nga sngew ba nga dei u MDC uba sniewbok tam.”

U Ma Saron ula ong ia kane hadien ka jingpyndep iaka jingthep kyrteng haka 31 tarik Kyllalyngkot na ka bynta ba iakhun biang iaka MDC elekshon sha ka JHADC na Jowai South Constituency.

Ula ong ruh ba ha ki 6 snem ka jinglong MDC hapoh ka party NPP, wat hapdeng ki jingeh ula pyrshang ban wad ki lad ki lynti ban pynioh ia ki jingiarap bad pynbit pynbiang iaki jingdonkam jong u paid ka constituency.

Halor ka jingmih noh jong u na ka NPP, u Ma Saron ula pynshai ba ka jingmih naka party NPP dei halor ka jingbym lah ka NPP ban weng iaki jingeh jong ka konsil.

U Ma Saron ula iathuh ba ka parti Congress kala synshar iaka ri da ki spah snem khlem jingshah kynthoh haduh kine ki sngi. Lah ban ong ba ka party Congress kala hiar hapoh ka jylla Meghalaya, hynrei lyngba kane ka election MDC u kyrmen ba ki paidbah kin bishar iaki kam kiba ka sorkar kaba mynta kaei kaba kila leh hapoh ka jingialam ka NPP bad ki kam jong ka Congress kaba ka la dep leh na ka bynta u paidbah haki por kiba la leit noh.

Ha kaba iadei bad ka jingpynbeit thymmai iaki MDC Constituency, ula ong ba ka jingpynduh iaka Jowai Central MDC Constituency ka long kaba sngewsih iaka sor Jowai, hynrei ka dei ka jingleh ka delimitation committee kaba la bynshet haka ban peit ia kam phiah constituency.

“Hooid, ka dei ka jingduh nong kaba khraw ia nga ha ki shnong kiba la pynkynriah noh na ka Jowai South, namar kam don ka jingpyrshah naki shnong bad nga la hun bad u paidbah hi u bishar ia kaei kaba ka delimitation committee kala leh,” la bynrap u Saron